Ukraina Favqulodda va Muxtor Elchisi Nikola Doroshenko Oʻzbekistondagi diplomatik missiyasini yakunlamoqda. Bu haqda u oʻzining Facebook sahifasida ma’lum qildi.
«Diplomatik korpus rotatsiyasi doirasida Ukraina Prezidenti Vladimir Zelenskiy mening Oʻzbekiston Respublikasidagi missiyamni yakunlash toʻgʻrisida qaror qabul qildi.
Bu mening davlatim rahbariyatining, xalqimning eng yuqori darajadagi ishonchi va men uni oqlash uchun bor kuchimni sarfladim», — deb yozdi u.
Elchi oʻzi uchun davlat manfaatlarini himoya qilish va vakillik qilish sharafiga muyassar boʻlganini, bu esa ogʻir — urush davrida roʻy berganini taʼkidladi.
«Mening vazifam bu fakt haqida gapirish, oʻzbek jamiyatiga haqiqatni yetkazish, bugungi Ukraina nima bilan yashayotganini, nega uning oʻgʻil-qizlari halok boʻlayotganini tushuntirish edi.
Umid qilamanki, mening ishim tufayli oʻzbek muhitida haqiqat urugʻlari koʻproq unib chiqadi», — deya qoʻshimcha qildi Doroshenko.
Nikola Doroshenko 2020-yil aprel oyida Ukraina elchisi etib Oʻzbekistonga tayinlangan edi. Oʻsha yilning oktabr oyida u «Koʻksaroy» qarorgohida Oʻzbekiston Prezidentiga ishonch yorliqlarini topshirdi.