Adliya vazirligi eʼlon qilganidek, anʼanaviy Xorazm taomi boʻlmish «Tuxum barak» geografik koʻrsatkich sifatida rasman roʻyxatdan oʻtkazildi.
Mazkur taom oʻziga xos tayyorlash uslubi, farqlovchi tarkibiy qismlari va qadimgi oshpazlik anʼanalari asosida tayyorlanishi bilan ajralib turadi.
«Tuxum barak» Xorazm viloyatida keng tarqalgan boʻlib, uning boy madaniy va gastronomik merosini aks ettiradi. Geografik koʻrsatkich sifatida roʻyxatdan oʻtkazilishi uning sifatini va obroʻsini himoya qilish, shuningdek, uni Xorazmning hududiy brendi sifatida targʻib qilish imkonini beradi.
Maʼlumot uchun, geografik koʻrsatkich – bu mahsulotning maʼlum bir geografik hudud va uning xususiyatlari bilan bogʻliq boʻlgan oʻziga xos xususiyatlarga ega ekanligini bildiruvchi intellektual mulk turi hisoblanadi.
2024-yil yanvar oyida «Gʻuzor tandir goʻshti» ham geografik koʻrsatkich maqomiga ega boʻldi. Bundan tashqari, «Gʻijduvon shashlik», «Zomin tandir goʻshti», «Margʻilon adras» va «Qoʻqon pichoqlari» ham patentlangan.
2025-yil 5-fevralda Samarqand noni ham shunga oʻxshash geografik koʻrsatkich sifatida roʻyxatdan oʻtkazildi.