Qozogʻiston Prezidenti Qasim-Jomart Toqayev Jahon Taekvondo (WT) Prezidenti Chungvon Choue tomonidan toʻqqizinchi darajali qora kamar bilan taqdirlanganidan soʻng, oʻzining jang sanʼati mahoratini namoyish qilib, yogʻoch taxtani sindirdi. Bu voqea Qozogʻiston prezidentining matbuot xizmati tomonidan xabar qilindi.
Marosim Prezident Toqayev va WT Prezidenti Chungvon Choue oʻrtasidagi uchrashuv vaqtida boʻlib oʻtdi.
Prezident Toqayev taekvondo nafaqat Olimpiya sporti, balki uygʻunlik, intizom va oʻzaro hurmatga asoslangan falsafa ekanligini, butun dunyo boʻylab millionlab odamlarni birlashtirishini taʼkidladi.
Chungvon Choue Prezidentga iliq qabul uchun va Qozogʻistonda taekvondoni rivojlantirishga qoʻshgan doimiy koʻmagi uchun minnatdorchilik bildirdi.
U Astanada boʻlib oʻtadigan Kazakhstan Open 2025 xalqaro reyting turnirining (G1 toifasi) tashkiliy darajasini, mamlakatda ushbu sportga boʻlgan qiziqishning ortib borayotganini va qozogʻistonlik sportchilarning xalqaro maydondagi muvaffaqiyatlarini yuqori baholadi.
Prezident Toqayev Chungvon Choueʼni taekvondoni global miqyosda rivojlantirishga qoʻshgan ulkan hissasi uchun «Doʻstlik» ordeni bilan taqdirladi.
Toʻqqizinchi darajali qora kamar topshirilgandan soʻng, Prezident Toqayev yogʻoch taxtaga imzo chekdi va uni bir zarb bilan sindirdi.
Eʼtiborlisi, Qirgʻiziston Prezidenti Sadr Japarov ham taekvondo boʻyicha toʻqqizinchi darajali qora kamar sohibi hisoblanadi.