Rossiyada ikki tojikistonlik ayol isiriqni (harmala) mamlakatga olib kirishga uringani uchun jinoiy javobgarlikka tortildi. ASIA-Plus xabariga ko’ra, Tojikiston Bosh prokuraturasi ma’lumotiga tayanib, ayollardan biri sakkiz yilga ozodlikdan mahrum etilgan.
Agentlikning ta’kidlashicha, ayollar ushbu o’simlikni «shaxsiy va tibbiy maqsadlarda» olib kirishga uringan, ammo Rossiya aeroportlarida qo’lga olingan va keyinchalik ularga nisbatan jinoiy ish qo’zg’atilgan.
Ayollardan biriga giyohvandlik vositalarini sotish niyatida bo’lmagan holda saqlash, tashish, ishlab chiqarish va qayta ishlash (Rossiya Federatsiyasi Jinoyat kodeksining 228-moddasi 2-qismi), shuningdek, giyohvandlik vositalari bo’lgan o’simliklarni Rossiya bojxona chegarasidan noqonuniy olib o’tish (Rossiya Federatsiyasi Jinoyat kodeksining 229.1-moddasi 3-qismi) aybi qo’yilgan.
«Tergov yakunlangandan so’ng, jinoiy ish sudga yuborildi va sud ayblanuvchini 8 yilga ozodlikdan mahrum qilish to’g’risida hukm chiqardi», – deya xabar berdi Bosh prokuratura.
Ikkinchi qo’lga olingan ayolning taqdiri haqida xabar berilmagan.
Bosh prokuratura Tojikiston fuqarolarini isiriqni Rossiyaga olib o’tmaslik va undan mamlakat ichida foydalanmaslik haqida ogohlantirdi.
Agentlikning ta’kidlashicha, «10 donadan ortiq harmala» ni tashish va saqlash 1 million rublgacha jarima yoki qamoq jazosiga, hatto umrbod qamoq jazosiga olib kelishi mumkin.
2024-yil fevral oyida Rossiya harmalani giyohvandlik vositalari bo’lgan o’simliklar ro’yxatiga kiritdi, ularning noqonuniy savdosi, saqlanishi va iste’mol qilinishi katta miqdordagi jarimalar yoki qamoq jazosi bilan jazolanadi.