Тожикистон президенти Эмомали Раҳмон ижтимоий тармоқлардаги “лайк”лар учун жиноий жавобгарликни бекор қилувчи қонунни имзолади. Президент матбуот хизмати бу ҳақда маълум қилди.
“Тожикистон Республикасининг Жиноят кодексига ўзгартишлар киритиш тўғрисида”ги Тожикистон Республикаси Қонуни ижтимоий тармоқларда “лайк” ёки шунга ўхшаш реакция қолдирганлик учун жиноий жавобгарликни бекор қилади”, дейилган баёнотда.
Ўзгартишлар терроризмга оммавий тарғибот қилиш ва интернет орқали терроризмни оқлаш билан боғлиқ жиноят кодексининг икки моддасига таъсир кўрсатади. 2018 йилдан буён ушбу бандлар “лайк” ва репостларни ҳам қамраб олган бўлиб, 15 йилгача озодликдан маҳрум этиш билан жазоланар эди.
2024 йил баҳорида президент Раҳмон ҳуқуқни муҳофаза қилувчи органларни ушбу нормаларни жуда кенг қўллагани учун танқид қилди. У бу амалиётга чек қўйишга чақириб, “одамларни фақатгина онлайн фаолияти учун жазолаш мумкин эмас” деган эди.
Тожикистон Бош прокурор хонасининг маълумотларига кўра, ҳозирда 1500 дан ортиқ шахс онлайн изоҳлар ва реакциялар учун жазо муддатини ўтамоқда.