O‘zbekiston Respublikasi Prezidenti Shavkat Mirziyoyevning Ozarbayjonga davlat tashrifi doirasidagi keng qamrovli tadbirlar dasturi yakunlandi. Bu haqda Prezident matbuot xizmati xabar berdi.
2-iyul kuni davlat rahbari Bokuda bo‘lib turgan vaqtida Ozarbayjon Prezidenti Ilhom Aliyev bilan samarali muzokaralar o‘tkazdi.
Oliy davlatlararo kengashining ikkinchi yig‘ilishi bo‘lib o‘tdi, unda o‘zbek-ozarbayjon munosabatlarini do‘stlik, strategik sheriklik va ittifoqchilik asosida yanada mustahkamlash, shuningdek, amaliy hamkorlikni kengaytirish istiqbollari ko‘rib chiqildi.
Tashrif davomida hamkorlikning turli sohalarini qamrab olgan ikki tomonlama hujjatlarning salmoqli to‘plami imzolandi.
Davlat rahbarlari birgalikda Bokuda «O‘zbekiston» bog‘iga tamal toshi qo‘yishdi, O‘zbekistonning Bokudagi elchixonasi yangi binosini ochdilar va «Sea Breeze» kurort majmuasini ko‘zdan kechirdilar.
3-iyul kuni dasturni davom ettirgan O‘zbekiston va Ozarbayjon prezidentlari birgalikda Xankendi shahrida O‘zbekiston-Ozarbayjon tikuvchilik fabrikasini, shuningdek, Ag‘damdagi «Imorat» tarixiy-me’moriy majmuasini ko‘zdan kechirdilar.
Tashrifning so‘nggi kunida davlat rahbari Iqtisodiy Hamkorlik Tashkilotining 17-sammitida ishtirok etdi, unda sheriklik ustuvor yo‘nalishlarini belgilab berdi va bir qator muhim tashabbuslarni ilgari surdi.
Sammit doirasida Pokiston Bosh vaziri Shahboz Sharif va Afg‘oniston Bosh vazirining vazifasini bajaruvchi o‘rinbosari Mulla Abdul G‘ani Baradar bilan ikki tomonlama uchrashuvlar bo‘lib o‘tdi.
Tashrif tadbirlari yakunlangach, davlat rahbari Toshkentga jo‘nab ketdi. Fuzuliy xalqaro aeroportida Prezidentni Ozarbayjon madaniyat vaziri Odil Karimli va boshqa rasmiy shaxslar kuzatib qo‘ydi.