Oʻzbekiston Respublikasi Prezidenti Shavkat Mirziyoyev 4-avgust kuni Prezident Serdar Berdimuhamedovning taklifiga binoan Turkmanistonga ishchi tashrif bilan joʻnab ketdi. Prezident matbuot xizmatining xabar berishicha, tashrifdan koʻzlangan maqsad dengizga chiqish imkoniyati boʻlmagan rivojlanayotgan mamlakatlar boʻyicha uchinchi BMT konferensiyasida ishtirok etishdir.
Avazada boʻlib oʻtadigan ushbu konferensiyada transport aloqalarini mustahkamlash va savdo tartib-taomillarini soddalashtirish, iqtisodiy oʻzgarishlar, iqlim oʻzgarishiga va ekologik muammolarga chidamlilikni oshirish, shuningdek, Barqaror rivojlanish maqsadlariga erishish kabi muhim masalalar koʻrib chiqiladi.
Avaza siyosiy deklaratsiyasi va Harakatlar dasturini qabul qilish kutilmoqda.
Davlat rahbari, shuningdek, Markaziy Osiyo davlatlari rahbarlarining yettinchi Maslahat uchrashuviga tayyorgarlik koʻrishga bagʻishlangan tadbirda ishtirok etadi va bir qator ikki tomonlama muzokaralar oʻtkazadi.