Prezident Shavkat Mirziyoyev 4-iyul kuni Ozarbayjonning Xonkendi shahrida boʻlib oʻtgan Iqtisodiy Hamkorlik Tashkilotining (IHT) 17-sammitida ishtirok etdi, bu haqda prezident matbuot xizmati xabar berdi.
Ozarbayjon Respublikasi Prezidenti Ilhom Aliyev raisligida oʻtgan tadbirda Eron Islom Respublikasi Prezidenti Masud Pezeshkiyan, Qirgʻiz Respublikasi Prezidenti Sadir Japarov, Tojikiston Respublikasi Prezidenti Emomali Rahmon, Turkiya Respublikasi Prezidenti Rejep Tayyip Erdogʻan, Pokiston Islom Respublikasi Bosh vaziri Shahbaz Sharif, Qozogʻiston Respublikasi Bosh vaziri Oljas Bektenov, Turkmaniston Vazirlar Mahkamasi Raisining oʻrinbosari – Tashqi ishlar vaziri Rashid Meredov, Afgʻoniston Bosh vazirining vazifasini bajaruvchi oʻrinbosari Mulla Abdul Gʻani Baradar, IHT Bosh kotibi Asad Majid Xon, shuningdek, boshqa davlatlar va mintaqaviy tashkilotlardan kelgan delegatsiyalar rahbarlari ham ishtirok etdi.
IHT doirasida koʻp qirrali hamkorlikni yanada rivojlantirish istiqbollari koʻrib chiqildi hamda dolzarb xalqaro va mintaqaviy masalalar yuzasidan fikr almashildi.
Oʻz nutqining boshida Oʻzbekiston Prezidenti xavfsizlik va barqaror rivojlanishga tahdid solayotgan zamonaviy muammolarni qayd etdi.
Oʻzbekiston rahbari mojarolar va nizolarni diplomatiya va konstruktiv muzokaralar orqali hal etish muhimligini taʼkidladi.
Yaqin Sharqda tinchlik va barqarorlikka Falastin-Isroil mojarosini adolatli hal qilmasdan erishib boʻlmasligi taʼkidlandi.
Oʻzbekiston Prezidenti yigʻilish kun tartibiga oʻtib, bir qator dolzarb masalalarga eʼtiborni qaratdi.
Avvalo, Tashkilotning oʻrta va uzoq muddatli rivojlanish ustuvorliklarini ilgari surish maqsadida “Iqtisodiy sheriklikning strategik maqsadlari – 2035” konsepsiyasini qabul qilish muhimligi qayd etildi. Mazkur hujjatda hamkorlikning anʼanaviy yoʻnalishlari bilan birga innovatsiya, sunʼiy intellekt va raqamli texnologiyalar sohalarida hamkorlikni mustahkamlashga alohida eʼtibor qaratish lozim.
Tovar va xizmatlar savdosini soddalashtirish, texnik va no-tarif toʻsiqlarni bosqichma-bosqich bartaraf etish va elektron tijoratni rivojlantirish masalalari hamon dolzarbligicha qolmoqda.
Ushbu yoʻnalishdagi strategik masalalarni muhokama qilish va Savdoni osonlashtirish toʻgʻrisidagi bitimni qabul qilish uchun joriy yilda Toshkent shahrida savdo vazirlarining yigʻilishini oʻtkazish taklif etildi.
Davlat rahbari, shuningdek, qishloq xoʻjaligi mahsulotlari savdosi toʻgʻrisida tezkor maʼlumot almashish va ularni toʻsiqsiz yetkazib berish uchun “yashil yoʻlaklar” tizimini yaratish tashabbusini ilgari surdi.
Investitsiya sohasidagi hamkorlikni yangi bosqichga olib chiqish va yanada shaffof va jozibador investitsiya muhitini yaratish uchun uzoq muddatli “Ecoinvest” dasturini qabul qilish muhimligi taʼkidlandi.
«Dasturning asosiy maqsadi mintaqamizdagi istiqbolli loyihalarga xususiy investorlar, banklar va xalqaro moliya institutlarini keng jalb qilishdan iborat boʻlishi kerak», – dedi Oʻzbekiston rahbari.
Hozirgi geosiyosiy vaziyatda muqobil transport yoʻlaklarini shakllantirish strategik ustuvor vazifa hisoblanadi. Kelajakda istiqbolli Trans-Afgʻon yoʻlagi bilan bogʻlanishi mumkin boʻlgan Xitoy – Qirgʻiziston – Oʻzbekiston temir yoʻli loyihasi ulkan mintaqadagi tranzit tarmoqlarini samarali bogʻlashi taʼkidlandi.
Davlat rahbari, shuningdek, transport va logistika sohasini raqamlashtirish boʻyicha tizimli ishlarni yoʻlga qoʻyish maqsadida Raqamli transport va bojxona agentligini yaratishni tezlashtirishni taklif qildi.
«Hozirgi vazifalarimiz mintaqada yangi aviaqatnovlarni ochish, aviakompaniyalar oʻrtasida hamkorlikning innovatsion shakllarini joriy etish, turizm va aviatsiya sohalarida integratsiyalashgan marketing strategiyalarini ishlab chiqishdan iborat», – dedi Oʻzbekiston rahbari.
Ushbu masalalarni muhokama qilish uchun joriy yilda Samarqand shahrida milliy aviakompaniyalar forumini tashkil etish taklif etildi.
Turistik oqimni ikki barobarga oshirish uchun katta imkoniyatlar mavjudligi qayd etildi. Tashkilot doirasida turizm xizmatlarini kengaytirish boʻyicha “yoʻl xaritasi”ni qabul qilish ushbu maqsadga erishishga xizmat qiladi.
Global iqlim muammolari boʻyicha saʼy-harakatlarni birlashtirish muhimligini qayd etgan Prezident choʻl hududlarida oʻrmonlar va rekreatsiya zonalarini yaratish boʻyicha transchegaraviy “yashil dastur”ni ishlab chiqish tashabbusini ilgari surdi.
Oʻzbekiston rahbari Yuqori darajadagi qoʻmitaning faoliyatini ijobiy baholab, unga IHT faoliyatini keyingi sammitga qadar yaxshilash boʻyicha aniq tavsiyalar tayyorlashni topshirishni taklif qildi.
«Islohotlar hamkorligimizni yangi bosqichga olib chiqishga, Tashkilotning xalqaro maydondagi nufuzini yanada mustahkamlashga xizmat qiladi», – dedi Prezident.
Soʻzining yakunida Davlat rahbari ushbu sammit Iqtisodiy hamkorlik tashkiloti doirasidagi koʻp qirrali amaliy hamkorlikka kuchli turtki berishi va yangi bosqichni ochib berishiga ishonch bildirdi.