Turkmaniston Prezidenti Serdar Berdimuhamedovning taklifiga binoan Prezident Shavkat Mirziyoyev 4-5 avgust kunlari Turkmanistonga tashrif buyuradi. Tashrifdan maqsad – dengizga chiqish imkoniyati bo‘lmagan rivojlanayotgan davlatlar bo‘yicha Birlashgan Millatlar Tashkilotining uchinchi konferensiyasida ishtirok etish. Bu haqda Prezident matbuot xizmati xabar bermoqda.
“Avaza” Milliy sayyohlik zonasida bo‘lib o‘tadigan tadbirda BMT Bosh kotibi Antoniu Guterrish, xorijiy davlatlar va hukumatlar rahbarlari, xalqaro va mintaqaviy tashkilotlar yetakchilari ishtirok etadi.
Konferensiya kun tartibiga transport aloqadorligini mustahkamlash va savdo tartib-taomillarini soddalashtirish, iqtisodiy transformatsiya, iqlim o‘zgarishi va ekologik muammolarga chidamlilikni oshirish, Barqaror rivojlanish maqsadlarini amalga oshirishda taraqqiyotga erishishda xalqaro hamkorlikning dolzarb masalalari kiritilgan. Avaza siyosiy deklaratsiyasi va harakat dasturini qabul qilish kutilmoqda.
O‘zbekiston rahbari Turkmanistonda bo‘lishi davomida Markaziy Osiyo davlatlari rahbarlarining yettinchi Maslahat uchrashuviga tayyorgarlik ko‘rishga bag‘ishlangan tadbirda ham ishtirok etadi va bir qator ikki tomonlama muzokaralar o‘tkazadi.