29-iyun kuni Prezident Shavkat Mirziyoyev telefon orqali muloqot chog‘ida Turkmaniston xalqining Milliy yetakchisi, Xalq Maslahati Raisi Gurbanguli Berdimuhamedovni tavallud kuni bilan samimiy muborakbod etib, unga sihat-salomatlik, oilaviy baxt va farovonlik, qardosh Turkmanistonga esa tinchlik va ravnaq tiladi. Bu haqda Prezident matbuot xizmati xabar berdi.
Davlat rahbari Gurbanguli Berdimuhamedovning zamonaviy Turkmanistonni shakllantirish va barqaror rivojlantirishga, mamlakatning xalqaro nufuzini oshirishga, shuningdek, O‘zbekiston-Turkmaniston do‘stlik, yaxshi qo‘shnichilik va strategik sheriklik munosabatlarini mustahkamlashga qo‘shgan shaxsiy hissasini alohida ta’kidladi.
Turkman xalqining Milliy yetakchisi Turkmaniston Prezidenti Serdar Berdimuhamedovning O‘zbekiston Prezidentiga salomini yetkazdi.
So‘nggi yillarda erishilgan ikki tomonlama hamkorlikning misli ko‘rilmagan darajasi, avvalambor, mamlakatlarimiz yetakchilarining muntazam uchrashuvlari tufayli erishilgani alohida mamnuniyat bilan qayd etildi.
Idoralararo yaqin va samarali aloqalar saqlanib, tovar ayirboshlash va yuk tashish hajmi o‘sib bormoqda. “Shovot – Toshhovuz” chegara savdo zonasini yakunlash kabi muhim hamkorlik loyihalari amalga oshirilmoqda.
Faol madaniy-gumanitar almashinuvlar amalga oshirilmoqda. Qo‘shma Hukumatlararo komissiyaning navbatdagi yig‘ilishi, Hududlararo forum va Biznes kengashini o‘tkazish rejalashtirilgan.
Shuningdek, mintaqaviy hamkorlikning dolzarb jihatlari, jumladan, shu yilning sentyabr oyida Toshkent shahrida bo‘lib o‘tadigan Markaziy Osiyo davlatlari rahbarlarining yettinchi Maslahat uchrashuviga tayyorgarlik ko‘rish masalalari ham ko‘rib chiqildi.