Ozarbayjonga davlat tashrifi bilan kelgan Oʻzbekiston Prezidenti Shavkat Mirziyoyevni Bokudagi «Zagulba» qarorgohida rasmiy kutib olish marosimi boʻlib oʻtdi. Bu haqda Prezident matbuot xizmati xabar berdi.
Qarorgoh oldidagi maydonda ikki davlat bayroqlari koʻtarilib, faxriy qorovul saf tortdi.
Mehmonni Ozarbayjon Respublikasi Prezidenti Ilhom Aliyev iliq kutib oldi.
Oʻzbekiston va Ozarbayjon davlat madhiyalari yangradi. Harbiy orkestr joʻrligida faxriy qorovul davlat rahbarlari oldidan oʻtdi.
Qoʻshma suratga tushgandan soʻng, Oʻzbekiston va Ozarbayjon prezidentlarining tor doiradagi uchrashuvi boshlandi.