Avvalroq Prezident Administratsiyasi rahbari Saida Mirziyoyeva Insoniy birodarlik boʻyicha Zayed mukofoti hakamlar hay’atiga qoʻshilgani haqida xabar berilgan edi. Mirziyoyeva oʻzining Telegram kanalida taklifni katta minnatdorchilik bilan qabul qilganini maʼlum qildi.
«Ushbu mukofot mojarolar va tushunmovchiliklar bilan boʻlingan dunyoda rahm-shafqat, jasorat va birlik sari intilish hurmatga loyiq ekanligining muhim eslatmasidir.
Insoniyatning eng yaxshi kelajagi bir-birimizga qanday munosabatda boʻlishimizga bogʻliq, deb chin dildan ishongan jasur va uzoqni koʻra biladigan insonlar bilan birga ishlaganimdan faxrlanaman», – deb yozdi Saida Mirziyoyeva.
Ushbu xalqaro va mustaqil mukofot insonparvarlik, birodarlik va birdamlik qadriyatlarini qatʼiyatlilik va tinimsiz targʻib qilgan butun dunyo boʻylab jismoniy shaxslar va tashkilotlarning hissalarini eʼtirof etish uchun taʼsis etilgan. Mukofot oʻzining insonparvarligi va odamlarga fidoyi yordami bilan tanilgan marhum Shayx Zayed bin Sulton Al Nahyan nomi bilan atalgan.
Saida Mirziyoyeva ushbu nufuzli xalqaro loyihada ishtirok etishga taklif qilingan Markaziy Osiyodan chiqqan birinchi vakil boʻldi.