Tojikiston va Qozog‘istonda kuydirgi kasalligi qayd etilganidan so‘ng, O‘zbekiston ushbu kasallikning mamlakatga kirib kelishining oldini olish uchun chegara nazoratini kuchaytirdi. Sanitariya-epidemiologik osoyishtalik va jamoat salomatligi qo‘mitasi bo‘lim boshlig‘i Farhod Qurbonbekov bu haqda ma’lum qildi.
Qurbonbekovning so‘zlariga ko’ra, mamlakatda ushbu kasallikning har qanday gumon qilingan holatlarini tashxislash va davolash uchun keng qamrovli infratuzilma yaratilgan. Bundan tashqari, potentsial infeksiya o’choqlaridan tuproq namunalari olinadi va muntazam laboratoriya monitoringidan o’tkaziladi.
«Kasallikning mamlakatga kirib kelishining oldini olish maqsadida 55 ta chegara punktida chegara orqali o’tayotgan shaxslar ustidan nazorat kuchaytirilgan. Ushbu punktlarda infeksiya tarqalishining oldini olish bo’yicha zarur choralar ishlab chiqilgan», – deydi mutaxassis.
Kuydirgi Bacillus anthracis bakteriyasi keltirib chiqaradigan, asosan hayvonlardan yuqadigan yuqumli kasallikdir. U o’ta xavfli infeksiya sifatida tasniflanadi.
Infeksiya isitmaga olib keladi va teri, o’pka va ichaklarga ta’sir qiladi. Barcha hayvon turlari, shuningdek, odamlar ham kasallikka chalinishi mumkin. Odamlarga yuqishi odatda kasallangan hayvonlarga qarash, so’yish yoki yaxshi pishirilmagan go’shtni iste’mol qilish orqali sodir bo’ladi.
Kuydirgining teri shakli eng keng tarqalgan hisoblanadi. O’z vaqtida davolanish bilan u odatda engil kechadi va uzoq muddatli ta’sir ko’rsatmaydi. Septik, ichak va o’pka kuydirgisi kabi og’irroq shakllari odatda o’limga olib keladi.