Ijtimoiy tarmoqlarda Qo‘qondagi zavodda ammiak oqishi haqida xabarlar tarqaldi. Milliy gvardiya bu voqea yuzasidan rasmiy bayonot berdi.
Indorama Kokand Fertilizers & Chemicals ma’lumotlariga ko‘ra, temir yo‘l vagonidan saqlash idishiga suyuq ammiak o‘tkazish jarayonida shlang yorilib, ammiakning taxminan 10 foizi zavod hududiga tarqalgan.
Voqea joyiga Milliy gvardiya askarlari, ichki ishlar va favqulodda vaziyatlar xizmati xodimlari yetib borishdi. Zavod xodimlari va yaqin atrofdagi aholining barchasi evakuatsiya qilindi.
Hodisadan so‘ng taxminan 10 kishi tibbiy yordamga murojaat qildi.
Aholi xavfsizligini ta’minlash maqsadida zavodga olib boradigan yo‘llar hozirda yopiq. Favqulodda vaziyat xodimlar va texnikalar yordamida bartaraf etildi. Huquqni muhofaza qilish organlari vaziyatni nazorat ostida ushlab turibdi.
Aholidan xotirjam bo‘lish va keraksiz vahimaga berilmaslik so‘raladi.