Qirgʻizistonning Jogorku Keneshi (parlamenti) davlat tilidan foydalanish boʻyicha bir qator qonunchilik hujjatlariga oʻzgartirishlar kirituvchi qonun loyihalarini ikkinchi va uchinchi oʻqishda maʼqulladi, bu haqda 24.kg xabar berdi.
Oʻzgartirishlarga koʻra, deputatlar, Vazirlar Mahkamasi Raisi, Vazirlar Mahkamasi aʼzolari, Konstitutsiyaviy, Oliy va mahalliy sudlar sudyalari, prokurorlar va tergovchilar qirgʻiz tilini bilishlari shart. Bu talab Milliy bank xodimlari, huquqni muhofaza qilish organlari xodimlari va milliy xavfsizlik xodimlariga ham tegishli.
Bundan tashqari, advokatlar va notariuslar litsenziya olish uchun qirgʻiz tili boʻyicha yetarli darajada bilimga ega ekanliklarini koʻrsatishlari kerak boʻladi.
Tashabbuslar, shuningdek, Televideniye va radioeshittirish toʻgʻrisidagi qonunga oʻzgartirishlar kiritadi, bunda umumiy efirga uzatiladigan kontentning kamida 60 foizi davlat tilida boʻlishi kerakligi belgilangan.
Qonun loyihalari, shuningdek, Tashqi migratsiya toʻgʻrisidagi qonunga ham oʻzgartirishlar kiritadi. Mamlakatda doimiy yashash uchun zarur boʻlgan darajada davlat tilini bilmaslik endi yashash uchun ruxsat berishni rad etish uchun asos boʻlishi mumkin. Chet el fuqarolari qirgʻiz tilini bilmasalar, muhojir maqomini ham ololmaydilar.
Davlat tilida tayyorlangan reklama matni til qonunchiligi va orfografiya qoidalariga muvofiqligini taʼminlash uchun mahalliy oʻzini oʻzi boshqarishning ijro etuvchi organi tomonidan tasdiqlanishi kerak.
Til qonunchiligini buzish yoki unga rioya qilmaslik jismoniy shaxslar uchun 5000 som va yuridik shaxslar uchun 17000 som miqdorida ogohlantirish yoki jarima solishga olib keladi. Ushbu qoida shaxslarning til bilimi boʻyicha normativ-huquqiy hujjatlarda belgilangan talablarni istisno qiladi.
Davlat tili va til siyosati boʻyicha Milliy komissiya qonunbuzarliklarni koʻrib chiqish va jarimalar solish uchun masʼuldir.