17-avgust kuni O‘zbekiston Respublikasi Prezidenti Shavkat Mirziyoyev va Rossiya Federatsiyasi Prezidenti Vladimir Putin o‘rtasida telefon orqali muloqot bo‘lib o‘tdi. Davlatimiz rahbari matbuot xizmatining xabar berishicha, suhbatda xalqaro va ikki tomonlama kun tartibining dolzarb jihatlari muhokama qilindi.
Rossiya Prezidenti davlatimiz rahbariga 15-avgust kuni Ankorij shahrida bo‘lib o‘tgan Rossiya-Amerika sammitining asosiy natijalari haqida ma’lumot berdi.
Davlatimiz rahbari erishilgan kelishuvlarni qo‘llab-quvvatlab, Ukraina atrofidagi vaziyat tez orada hal etilishiga umid bildirdi.
Shuningdek, savdo-iqtisodiy hamkorlikning joriy sur’atini saqlab qolish va O‘zbekiston va Rossiya korxonalari o‘rtasidagi hamkorlikning ustuvor loyihalarini amalga oshirishni tezlashtirishga qaratilgan muvofiqlashtirilgan choralarni qabul qilish masalalari ko‘rib chiqildi. Barcha darajalarda faol aloqa va almashinuvlarni davom ettirish muhimligi ta’kidlandi.