Oʻzbekiston fuqarosi, Buxoro viloyati aholisi S.I. oʻz vataniga ikki nafar voyaga yetmagan farzandi bilan qaytishda yordam soʻrab, Omanda joylashgan Oʻzbekiston elchixonasiga murojaat qilganini “Dunyo” axborot agentligi xabar qilmoqda.
Bayonnomada S.I. 2019 yildan buyon Omanning Al-Buraymi shahrida istiqomat qilayotgani, hech qanday fuqaroligiga ega boʻlmagan eronlik erkakka turmushga chiqqanini ma’lum qilgan.
S.I. 2020 yilda qizi va 2022 yilda oʻgʻlini dunyoga keltirgan, ammo hujjatlar bilan bogʻliq muammolar tufayli farzandlari uchun oʻz vaqtida tugʻilganlik toʻgʻrisidagi guvohnoma ololmagan.
S.I.ning eri giyohvandlikka berilib, uni va bolalarini tez-tez kaltaklagan. Uni uyda qamab qoʻygan.
S.I. farzandlarining tugʻilganlik toʻgʻrisidagi guvohnomalari yoʻqligi sababli Oʻzbekistonga farzandlari bilan keta olmasligini aytgan va ozod qilinishi va Oʻzbekistonga qaytish uchun zarur hujjatlarni olishda yordam soʻragan.
Elchixona xodimlari Al-Buraymida S.I.ning yashash joyiga borib, uni va farzandlarini Maskatga olib kelishgan va vaqtincha boshqa bir oʻzbekistonlik fuqaro huzurida joylashtirishgan.
Diplomatlar Omanning tegishli vakolatli organlari bilan hamkorlik qilib, S.I.ning farzandlari uchun tugʻilganlik toʻgʻrisidagi guvohnomalar va Oʻzbekistonga qaytish uchun zarur hujjatlarni olishgan. “Vatan-doshlar” jamgʻarmasi, Oʻzbekiston Migratsiya agentligi va Maskatdagi yurtdoshlar yordami bilan oila uchun Oʻzbekistonga aviabiletlar sotib olingan.
18-iyun kuni ayol va ikki farzandi Oʻzbekistonga qaytib kelishdi.