Buxoro neftni qayta ishlash zavodi Ai-92 benzinining narxini pasaytirdi. Bu haqda 11-avgust kuni “O‘zbekneftgaz” matbuot xizmati ma’lum qildi.
Prezidentning aholini arzon narxlarda yuqori sifatli yoqilg‘i mahsulotlari bilan ta’minlash bo‘yicha ko‘rsatmalariga muvofiq, Buxoro neftni qayta ishlash zavodi Ai-92 benzin narxlarini bosqichma-bosqich pasaytirish bo‘yicha ish olib bormoqda.
Ushbu tashabbus “O‘zbekneftgaz”ning yoqilg‘i bozori barqarorligini qo‘llab-quvvatlash va iste’molchilar uchun sifatli benzin mavjudligini ta’minlash strategiyasining asosiy tarkibiy qismidir.
Birinchi bosqichda Buxoro neftni qayta ishlash zavodida ishlab chiqarilgan 1 tonna Ai-92 benzinining birja savdolaridagi boshlang‘ich narxi 12 million 881 ming so‘mdan 12 million 628 ming so‘mga tushirildi. Bu Ai-92 benzinining bir litri uchun boshlang‘ich birja narxi 9400 so‘mni tashkil etadi, degani.
«Strategiya doirasida ishlab chiqarish jarayonlari optimallashtirildi va xarajatlarni kamaytirish bo‘yicha kompleks chora-tadbirlar amalga oshirildi. Shu bilan birga, benzin ishlab chiqarish hajmi oshirildi, narxi esa pasaytirildi», — deyiladi xabarda.
“O‘zbekneftgaz” ichki bozorni rivojlantirish va iste’molchilar manfaatlarini qo‘llab-quvvatlash maqsadida yuqori oktanli yoqilg‘i narxlarini bosqichma-bosqich pasaytirishda davom etadi.
Avvalroq kompaniya sentyabr oyidan boshlab Ai-80 markali benzin ishlab chiqarishni to‘xtatishi haqida xabar berilgan edi. Kompaniya 2026-yildan faqat yuqori oktanli yoqilg‘i sotuviga o‘tishni rejalashtirmoqda.