Turkiyada O‘zbekiston fuqarosi rashk oqibatida xotinini o‘ldirganlikda gumonlanmoqda, deb xabar beradi O‘zbekistonning Istanbuldagi Bosh konsulxonasi bayonoti.
Hodisa 17-avgust kuni Istanbulning Umraniye tumanida sodir bo‘lgan. Ma’lum bo’lishicha, vaqtincha ishlash uchun Turkiyaga kelgan, Samarqand viloyatidan bo’lgan 35 yoshli O’zbekiston fuqarosi N.S. eri, shuningdek, O’zbekiston fuqarosi U.S. tomonidan pichoqlab o’ldirilgan. Xabarlarga ko’ra, gumon qilinayotgan motiv rashk bo’lgan.
Qidiruv operatsiyalaridan so‘ng, Istanbul politsiyasi 18-avgust kuni ertalab Umraniye tumanida gumonlanuvchini qo‘lga oldi. Bundan tashqari, yana bir o‘zbekistonlik fuqaro B.O. gumonlanuvchiga dalillarni yashirishda yordam berganlikda gumonlanib hibsga olingan.
19-avgust kuni sud ikkala gumonlanuvchiga nisbatan qamoqqa olish ehtiyot chorasini qo‘lladi. Hozirda hodisa yuzasidan tergov ishlari olib borilmoqda.
Marhumaning jasadini O‘zbekistonga qaytarish uchun zarur hujjatlar rasmiylashtirilmoqda. Vazirlar Mahkamasi huzuridagi Tashqi mehnat migratsiyasi agentligi ushbu masalada zarur yordam ko‘rsatmoqda, deyiladi Bosh konsulxona xabarida.