O‘zbekistonlik talabalar bir vaqtning o‘zida 2000 ta robot yig‘ib, Ginnesning rekordlar kitobiga kirishni maqsad qilgan. Bu haqda Prezident Administratsiyasi rahbarining ta’lim islohotlari bo‘yicha o‘rinbosari Hilola Umarova ma’lum qildi.
Xabar qilinishicha, joriy yilning 18-avgust kuni 2000 nafar yosh muhandis “Yangi O‘zbekiston” bog‘ida to‘planib, bir vaqtning o‘zida 2000 ta robotni yig‘adi va ishga tushiradi va shu orqali Ginnesning yangi rekordini o‘rnatishga urinib ko‘radi.
Tadbirda respublika poytaxti va viloyatlaridan minglab yoshlar, jumladan, imkoniyati cheklangan yosh muhandislar ham ishtirok etadi.
Avvalgi rekord 2023-yil 23-yanvarda Hindistonda qayd etilgan bo‘lib, o‘shanda 6-sinfdan 10-sinfgacha bo‘lgan 1459 nafar o‘quvchi bir vaqtning o‘zida mini-robotlarni yig‘ishgan edi.