O‘zbekiston Respublikasi Senatining to‘qqizinchi yalpi majlisida «Voyaga yetmagan shaxslarga nisbatan jinoiy javobgarlikni yanada liberallashtirish munosabati bilan O‘zbekiston Respublikasining Jinoyat kodeksiga o‘zgartish va qo‘shimchalar kiritish to‘g‘risida»gi Qonun ko‘rib chiqilib, ma’qullandi, deb xabar beradi Senat matbuot xizmati.
Qonun Jinoyat kodeksining bir qator moddalariga o‘zgartish va qo‘shimchalar kiritadi.
Xususan, unda o‘n sakkiz yoshga to‘lmasdan turib sodir etilgan, uncha og‘ir bo‘lmagan jinoyat uchun jazoni o‘tagan shaxsning sudlanganligi yo‘q hisoblanishi belgilangan.
Qonun, shuningdek, voyaga yetmaganlar uchun ozodlikni cheklash va ozodlikdan mahrum qilishning eng kam muddatini olti oydan bir oyga qisqartiradi.
Senatorlarning fikricha, ushbu Qonun voyaga yetmaganlar uchun jinoiy javobgarlikni yanada liberallashtirishga yordam beradi va o‘n sakkiz yoshga to‘lmasdan turib sodir etgan jinoyatlari uchun jazoni o‘tagan shaxslarga sudlanganlik tamg‘asisiz hayotlarini davom ettirish uchun sharoit yaratadi.
Senat ma’lumotlariga ko‘ra, 2023-yilda mamlakatda 1911 nafar voyaga yetmagan shaxs jinoiy javobgarlikka tortilib, sudlangan, 2024-yilda esa 2214 nafar. O‘tgan yili ijtimoiy xavfi katta bo‘lmagan 1238 ta va uncha og‘ir bo‘lmagan 855 ta jinoyat sodir etilgan.