Oʻzbekistonda 22-23-avgust kunlari umumxalq xayriya hashari oʻtkaziladi. Bu haqda Vazirlar Mahkamasining qarorida ma’lum qilindi.
Hujjatga koʻra, tadbirda mahallalar, aholi punktlari, koʻp qavatli uylar, hovlilar, guzarlar, bogʻlar, ziyoratgohlar, qabristonlar, koʻchalar, yoʻlaklar va bolalar maydonlarida obodonlashtirish ishlari, jumladan, oqlash va daraxtlarni butash ishlari olib boriladi.
Kam ta’minlangan, parvarishga muhtoj, boquvchisini yoʻqotgan keksa odamlar va nogironligi boʻlgan fuqarolar kabi zaif aholi qatlamlarining uy-joy sharoitlarini yaxshilashga yordam koʻrsatiladi.
Obodonlashtirish ishlari davomida toʻplangan chiqindilar mahalliy ijro etuvchi hokimiyat organlari va boshqa mas’ul tashkilotlar tomonidan belgilangan joylarga olib ketiladi.
Biroq, avtomobil yoʻllarida, qatnovi gavjum koʻchalarda, suv havzalarida, qirgʻoq boʻylarida, qurilish maydonlarida, binolar va inshootlarning tomlarida, xavfli ishlab chiqarish ob’ektlarida va inson hayoti yoki sogʻligʻiga xavf tugʻdiradigan boshqa joylarda mustaqil ravishda ish olib borish qat’iyan man etiladi.
Vazirlar Mahkamasining «Oʻzbekiston Respublikasida majburiy mehnatga barham berish boʻyicha qoʻshimcha chora-tadbirlar toʻgʻrisida»gi qaroriga muvofiq, hashar davomida aholini qurilish, ta’mirlash va qishloq xoʻjaligi ishlari kabi boshqa turdagi jamoat ishlariga jalb qilish taqiqlanadi.