29-iyul kuni O‘zbekiston Respublikasi Prezidenti, Qurolli Kuchlar Oliy Bosh Qo‘mondoni Shavkat Mirziyoyev harbiy ta’limni takomillashtirish bo‘yicha takliflarni ko‘rib chiqdi. Bu haqda davlat rahbarining matbuot xizmati xabar berdi.
Tegishli topshiriq shu yilning 21-fevral kuni bo‘lib o‘tgan Xavfsizlik kengashi yig‘ilishida berilgan edi. 20 dan ortiq xorijiy davlatlarning ilg‘or tajribasi o‘rganilib, harbiy ta’limni isloh qilish bo‘yicha yangi milliy model ishlab chiqildi.
Xususan, Qurolli Kuchlar akademiyasini qayta tashkil etish va uning negizida O‘zbekiston Respublikasi Harbiy xavfsizlik va mudofaa universitetini tashkil etish taklif etilmoqda. Universitet tarkibiga Mudofaa vazirligining barcha harbiy ta’lim muassasalari – 5 ta institut, Serjantlar tayyorlash oliy maktabi, Aviatsiya va uchuvchisiz uchish apparatlari mutaxassislarini tayyorlash maktabi (institut maqomi bilan) kiradi. Qo‘shinlarning salohiyatini oshirish, dual ta’limni kengaytirish va ilmiy tadqiqotlar natijalarini amaliyotga keng joriy etish maqsadida markazlashgan vertikal tizim yaratiladi.
Misol uchun, armiyaning asosiy tayanchi bo‘lgan Serjantlar tayyorlash oliy maktabida yetakchilik qobiliyatlarini rivojlantirish, zamonaviy qurollardan foydalanish ko‘nikmalarini oshirish va yangi taktik usullarni o‘zlashtirish bo‘yicha yangi tizim joriy etiladi.
Yana bir yangilik – ixtisoslashgan sohalarda o‘qitish uchun gibrid «2+2» modelini joriy etish. Bunda fuqarolik oliy ta’lim muassasalarining ikkinchi kurs talabalari psixolog, aloqachi, ta’minotchi, omborchi kabi 18 ta mutaxassislik bo‘yicha kursant sifatida tanlab olinadi.
Iqtidorli yoshlarni qo‘llab-quvvatlash maqsadida yangi o‘quv yilidan boshlab Oliy Bosh Qo‘mondonning bitiruvchi kursantlar uchun davlat stipendiyasi ta’sis etiladi. Stipendiya sohibi bakalavr darajasini tugatgandan so‘ng 5 yil ichida imtihonsiz oliy harbiy ta’lim muassasasining magistratura dasturiga qabul qilinadi.
Bundan tashqari, oliy harbiy ta’lim muassasalari bitiruvchilari uchun 36 ta ta’lim yo‘nalishi bo‘yicha ikkita diplom – ham fuqarolik, ham harbiy kasb bo‘yicha diplom berish amaliyoti joriy etiladi. Bu harbiy xizmatchilarga xizmatdan keyin ham faol bandlikni davom ettirish imkonini beradi.
Amalga oshirilayotgan islohotlar munosabati bilan harbiy pedagoglarni yuqori sifatli tanlash va yollashga ehtiyoj ortadi. Yetakchi xorijiy davlatlarda harbiy pedagoglarni tayyorlash tizimi yaratiladi.
Taqdim etilgan takliflar ma’qullandi va ularni amaliyotga samarali tatbiq etish bo‘yicha ko‘rsatmalar berildi.