Taxminan 60 nafar Oʻzbekiston fuqarosi Eron hududidan Turkmaniston orqali evakuatsiya qilindi. Bu haqda “Dunyo” axborot agentligi xabar berdi.
“Yaqin Sharqdagi murakkab vaziyat tufayli Oʻzbekiston jumladan bir qator davlatlar oʻz fuqarolarining xavfsiz qaytishlarini taʼminlash boʻyicha faol choralar koʻrmoqda”, deyiladi xabarda.
Turkmaniston oʻz hududini tranzit maqsadida taqdim etmoqda va xalqaro gumanitar yordam koʻrsatishga faol ishtirok etmoqda hamda sezilarli hissa qoʻshmoqda. Davlat chegaralari, temir yoʻl stansiyalari va aeroportlarida tezkor va xavfsiz evakuatsiya qilish uchun qulay shart-sharoitlar yaratildi.
Oʻzbekiston Tashqi ishlar vazirligining koʻrsatmalari asosida mamlakatning Tehron va Ashxoboddagi diplomatik vakolatxonalarida 24/7 ishlashga tayyor operativ shtablar tashkil etildi. Eron hududidan Turkmaniston orqali Oʻzbekiston fuqarolarini qaytarish boʻyicha har tomonlama chora-tadbirlar amalga oshirilmoqda.
Oʻzbekistonning Tehronda joylashgan elchixonasi fuqarolarining xavfsiz oʻtishlarini taʼminlash uchun doimiy aloqa va muvofiqlashtirishni amalga oshirmoqda.
Oʻzbekistonning Ashxoboddagi elchixonasi Turkmaniston rasmiylari bilan hamkorlikda chegara punktida fuqarolarni kutib olish, viza va transport masalalarini hal qilish va ularning vatanga qaytishlariga koʻmaklashish jarayonini samarali tashkil etmoqda.
Bugungi kunga kelib, taxminan 60 nafar Oʻzbekiston fuqarosi Eron hududidan Turkmaniston orqali Oʻzbekistonga qaytarildi.
“Ushbu chora-tadbirlar yana bir bor “Yangi Oʻzbekiston”ning tashqi siyosatida fuqarolar manfaatlarini himoya qilish ustuvorligini tasdiqlaydi, shuningdek, mintaqa davlatlari oʻrtasidagi yaqin qoʻshnichilik munosabatlari va birdamligini namoyish etadi”, deyiladi xabarda.