Alisher To’xtayev O’zbekistonning Shri-Lankadagi birinchi elchisi etib tayinlandi. U ayni paytda Pokistondagi elchi lavozimida ham faoliyat yuritadi.
O’zbekistonning Islomobodda joylashgan Shri-Lankadagi Favqulodda va Muxtor Elchisi Alisher To’xtayev Shri-Lanka Tashqi ishlar vazirligi davlat protokoli boshlig’i Rohana Ambagollega ishonch yorliqlari nusxalarini topshirdi, deb xabar beradi «Dunyo» axborot agentligi.
Uchrashuv davomida Rohana Ambagolle O‘zbekiston rahbariyatiga Shri-Lankaga birinchi elchi tayinlagani uchun samimiy minnatdorchilik bildirdi. Uning ta’kidlashicha, bu qadam ikki davlat o’rtasidagi do’stona aloqalarni mustahkamlash yo’lidagi muhim siyosiy qaror bo’lib, ikki tomonlama hamkorlikka yangi turtki beradi.
Shri-Lankaning O’zbekiston bilan yangi formatdagi hamkorlikka ochiqligi tasdiqlandi va Prezident Shavkat Mirziyoyevning Global Janub bilan yaqinlashish, oziq-ovqat xavfsizligini ta’minlash va mintaqaviy o’zaro bog’liqlikni mustahkamlashga qaratilgan tashabbuslari yuqori baholandi.
Shri-Lanka vakili Alisher To’xtayevning Kolombodagi faoliyati barcha sohalarda tizimli va samarali ish uchun mustahkam poydevor yaratishiga ishonch bildirdi.
Shri-Lanka O’zbekiston bilan barcha sohalarda, ayniqsa, savdo, logistika, ta’lim va turizm sohalarida amaliy hamkorlikni tezroq kengaytirishdan manfaatdor ekanligi ta’kidlandi.
Tomonlar iqtisodiy diplomatiyani rivojlantirish va o’zaro savdo-iqtisodiy aloqalari istiqbollari yuzasidan fikr almashdilar. Hozirgi ikki tomonlama savdo hajmi qoniqarsiz ekanligi va yaqin kelajakda bu ko’rsatkichni 50 million dollarga yetkazish bo’yicha aniq chora-tadbirlar ko’rish to’g’risida kelishuvga erishildi.
Eksport-import ko’rsatkichlarini oshirish uchun transport va logistika yechimlarini birgalikda ishlab chiqish, axborot texnologiyalaridan foydalangan holda onlayn platformalar va dasturlarni joriy etish masalalari muhokama qilindi.