Hukumat qarori bilan jazo o‘tash muassasalaridan ozod qilingan shaxslarga bir martalik nafaqa tayinlash va to‘lash tartibi to‘g‘risidagi nizom tasdiqlandi.
Nizom jazo o‘tash muassasalaridan ozod etilgan shaxslarga bir martalik nafaqani tayinlash va to‘lash tartibini belgilaydi.
Nafaqani olish uchun arizalar, ularni ko‘rib chiqish va keyinchalik nafaqa tayinlash «E-probatsiya» axborot tizimi orqali amalga oshiriladi.
Arizachilar jazo o‘tash muassasasidan ozod etilgan kundan boshlab bir oy ichida tuman (shahar) probatsiya bo‘limlariga (vakolatli organ) shaxsan murojaat qilishlari kerak.
Vakolatli organ arizachiga nafaqa tayinlanganligi to‘g‘risida bir ish kuni ichida xabar beradi va to‘lovni olish uchun tijorat banki haqida ma’lumot beradi.
Oluvchilar nafaqani tijorat bankining istalgan filialida bir oy ichida shaxsni tasdiqlovchi hujjatlar yoki jazoni o‘tash yoki ozod qilish to‘g‘risidagi ma’lumotnomani taqdim etgan holda olishlari mumkin.
Nafaqaning miqdori 6 BHM (1-avgustdan – 2 million 472 ming so‘m) miqdorida belgilanadi.