Oʻzbekiston Respublikasi Tashqi ishlar vazirligi tomonidan eʼlon qilingan bayonotga koʻra, Oʻzbekiston Ozarbayjon Respublikasi va Armaniston Respublikasi oʻrtasidagi tinchlik muzokaralarida erishilgan sezilarli yutuqlarni yuqori baholaydi.
Bayonotda Vashingtonda tarixiy Qoʻshma deklaratsiyaning imzolanishi Ozarbayjon va Armaniston yetakchilarining kuchli siyosiy irodasi va qatʼiyati, shuningdek, Amerika Qoʻshma Shtatlari Prezidentining faol tinchlik oʻrnatish saʼy-harakatlari tufayli mumkin boʻlganligi taʼkidlangan.
«Biz uzoq davom etgan mojarolarni bartaraf etishga qaratilgan barcha tomonlarning saʼy-harakatlarini yuqori qadrlaymiz. Janubiy Kavkazda uzoq muddatli tinchlik va barqarorlikning tezroq oʻrnatilishi keng mintaqadagi barcha xalqlar manfaatlariga xizmat qiladigan yirik transport va infratuzilma loyihalarini ishga tushirishga yoʻl ochishiga ishonchimiz komil», — deyiladi bayonotda.
Armaniston va Ozarbayjon oʻrtasidagi tinchlik munosabatlari toʻgʻrisidagi deklaratsiya 8-avgust kuni Oq uyda imzolandi. AQSh prezidenti Donald Trump ham hujjatga guvoh sifatida imzo chekdi.