“Avaza” milliy sayyohlik zonasida O‘zbekiston Respublikasi Prezidenti Shavkat Mirziyoyev, turkman xalqining Milliy yetakchisi, Xalq Maslahati Raisi Gurbanguli Berdimuhamedov va Ozarbayjon Respublikasi Prezidenti Ilhom Aliyev o‘rtasida uch tomonlama uchrashuv bo‘lib o‘tdi. Bu haqda davlatimiz rahbari matbuot xizmati xabar bermoqda.
Uchrashuvda savdo-iqtisodiy, transport-kommunikatsiya, energetika va gumanitar sohalarda ko‘p tomonlama hamkorlikni rivojlantirish masalalari ko‘rib chiqildi.
Davlatimiz rahbari o‘z nutqining avvalida Gurbanguli Berdimuhamedovni avgust oyining boshida dengizga chiqish imkoniyati bo‘lmagan rivojlanayotgan davlatlar bo‘yicha BMTning uchinchi konferensiyasi muvaffaqiyatli o‘tkazilgani bilan yana bir bor samimiy tabrikladi.
O‘zbekiston Prezidenti, shuningdek, Ozarbayjon rahbari Ilhom Aliyevni Vashingtonda Armaniston bilan yaqinda imzolangan tinchlik deklaratsiyasi bilan chin dildan tabrikladi.
Davlatimiz rahbari ko‘p tomonlama hamkorlikni kengaytirish bo‘yicha bir qator aniq takliflarni ilgari surdi.
Uch davlatning muhim tranzit salohiyatidan to‘liq foydalanish zarurligi ta’kidlandi.
Mavjud va istiqbolli yo‘laklarni uyg‘unlashtirish Xitoyni Janubiy Osiyo, Yaqin Sharq va Yevropa bilan mamlakatlarimiz hududlari orqali bog‘laydigan barqaror va samarali transkontinental yo‘nalishni shakllantirish imkonini berishiga ishonch bildirildi.
Hozirda Xitoy-O‘zbekiston temir yo‘lini qurish ishlari boshlangan. Bundan tashqari, yaqinda Pokiston va Afg‘oniston bilan Trans-Afg‘on koridorini qurish loyihasi bo‘yicha memorandum imzolandi.
Yangi yuk oqimlari infratuzilmani, birinchi navbatda, Ozarbayjon, Turkmaniston va O‘zbekistonda samarali yuklashni ta’minlashga mo‘ljallangani ta’kidlandi.
O‘rta yo‘lakni, shu jumladan, Zangezur yo‘lagini rivojlantirish rejalari ham qo‘llab-quvvatlandi.
Eng muhim masalalarni birgalikda ekspertlar tomonidan o‘rganishni boshlash taklif etildi.
Bu Turkmanboshi va Boku portlarida quvvatlarni kengaytirish va zamonaviy logistika infratuzilmasini yaratish, muvofiqlashtirilgan tarif siyosatini amalga oshirish, tartiblarni raqamlashtirish va yuk monitoringini ta’minlash bilan bog‘liq.
O‘z navbatida, O‘zbekiston tomoni biznes uchun asosiy bozorlarga eng qisqa va foydali kirishni ta’minlash maqsadida o‘zaro asosda yuk tashish tariflarini kamaytirishga tayyorligini bildirdi.
Bundan tashqari, yagona yondashuv logistika infratuzilmasini rivojlantirishda potentsial donor bo‘lgan davlatlar va xalqaro tashkilotlar bilan pragmatik hamkorlik qilish imkonini berishi qayd etildi.
Shu bilan birga, O‘zbekiston Kaspiy dengizi orqali yuklarni tashish uchun o‘z parom quvvatlarini yaratishga qiziqish bildirdi.
Energetika xavfsizligini ta’minlash maqsadida hamkorlikni chuqurlashtirish va energiya resurslarini uchinchi davlatlarga eksport qilish yo‘laklarini rivojlantirish zarurligi qayd etildi.
Shu munosabat bilan Yevropaga “yashil” energiya yetkazib berishni tashkil etish loyihasi istiqbolli deb topildi.
An’anaviy uglevodorodlarga kelsak, Kaspiy shelfida geologiya-qidiruv ishlari olib borish va konlarni o‘zlashtirish sohasida hamkorlik qilish istiqbollarini o‘rganish taklif etildi.
Yana bir ustuvor yo‘nalish sifatida tovar aylanmasini va sanoat kooperatsiyasi ko‘lamini tubdan oshirish belgilandi. Ta’kidlanishicha, so‘nggi yillarda O‘zbekiston va Turkmaniston hamda Ozarbayjon o‘rtasidagi o‘zaro savdo hajmi ikki barobar oshdi. Tovar aylanmasi tarkibida sanoat tovarlarining ulushi 40 foizga yetdi.
Barqaror savdo va logistika zanjirlarini rivojlantirishni, ulgurji tarqatish markazlarini yaratishni va yirik chakana savdo tarmoqlariga kirishni, fitosanitariya va karantin talablarini unifikatsiya qilishni, raqamli mahsulotlarni markirovkalashni joriy etishni, qo‘shma elektron platformalarni ishga tushirishni va tovar birjalarida hamkorlikni kengaytirishni nazarda tutuvchi har tomonlama chora-tadbirlar rejasini birgalikda tayyorlash taklif etildi.
Gumanitar aloqalarni kengaytirish doirasida turistik va madaniy almashinuvlarning uch tomonlama dasturini qabul qilish taklif etildi, bu esa mamlakatlarimizdan va uchinchi davlatlardan turistlar oqimini oshiradi, umumiy boy madaniy merosni va xalqlarimizning an’analari va urf-odatlarining yaqinligini namoyish etadi.
Yakunda ilgari surilgan tashabbuslarni va erishilgan kelishuvlarni amaliy ro‘yobga chiqarish uchun davlatimiz rahbari “yo‘l xaritasi”ni tayyorlash, shuningdek, asosiy yo‘nalishlar bo‘yicha vazirlarning qo‘shma yig‘ilishlari mexanizmini ishga tushirishni taklif qildi.