7-iyun kuni Prezident Shavkat Mirziyoyev Al Mirqab Capital raisi Hamad bin Jassim Al Tani va Blackrockning boshqaruvchi direktori Adebayo Ogunlesi boshchiligidagi xorijiy investorlar delegatsiyasi bilan uchrashdi. Bu haqda Prezident matbuot xizmati xabar berdi.
Munosabatlarda o’zaro manfaatli hamkorlikni rivojlantirish va O’zbekistonda istiqbolli investitsiya loyihalarini amalga oshirish masalalari muhokama qilindi.
Ustuvor yo’nalishlar sifatida davlat-xususiy sherikchilik asosida yirik infratuzilma va sanoat loyihalarini amalga oshirish belgilab olindi. Bunga gaz va elektr energiyasi tarmoqlarini modernizatsiya qilish, suv ta’minoti tizimlarini takomillashtirish, energiya ishlab chiqarish va saqlash inshootlarini qurish, yuqori tezlikdagi temir yo’l liniyalarini barpo etish, ko’chmas mulk va biznes infratuzilmasini rivojlantirish kiradi.
Suhbat yakunida ushbu istiqbolli loyihalarni izchil rivojlantirish bo’yicha «yo’l xaritasi»ni ishlab chiqish to’g’risida kelishuvga erishildi.