8-iyul kuni O‘zbekiston Respublikasi Prezidenti Shavkat Mirziyoyev Rossiya Prezidenti Vladimir Putin bilan telefon orqali muloqot qildi. Bu haqda O‘zbekiston Prezidentining matbuot xizmati xabar berdi.
Muzokaralar davomida O‘zbekiston va Rossiya o‘rtasidagi keng qamrovli strategik sheriklik va ittifoqchilikni rivojlantirish va mustahkamlash masalalariga alohida e’tibor qaratildi. Savdo-iqtisodiy sohada eng yuqori darajada erishilgan kelishuvlarni amalda ro‘yobga chiqarishga urg‘u berildi.
Ikkala davlat rahbari savdo hajmini oshirish, asosiy iqtisodiyot tarmoqlarida sanoat kooperatsiyasi loyihalarini ilgari surish, mintaqaviy darajada samarali hamkorlikni kengaytirish, madaniy-gumanitar va ta’lim almashinuvini mustahkamlash maqsadida uzluksiz, muvofiqlashtirilgan sa’y-harakatlar va idoralararo amaliy hamkorlikning muhimligini ta’kidladilar.
Shu nuqtai nazardan, shu yilning kuzida bo‘lib o‘tishi rejalashtirilgan O‘zbekiston-Rossiya hududlararo kengashining ikkinchi yig‘ilishiga puxta tayyorgarlik ko‘rish va uning samaradorligini ta’minlash zarurligi ta’kidlandi.
Ikki davlat rahbari xalqaro kun tartibi yuzasidan ham fikr almashdilar va bo‘lajak tadbirlar jadvalini muhokama qildilar.