4-iyul kuni Ozarbayjonning Xankendi shahrida O‘zbekiston Respublikasi Prezidenti Shavkat Mirziyoyev Iqtisodiy hamkorlik tashkilotining (IHT) 17-sammitida ishtirok etdi. Bu haqda prezident matbuot xizmati xabar berdi.
Ozarbayjon Respublikasi Prezidenti Ilhom Aliyev raisligida o‘tgan tadbirda, shuningdek, Eron Islom Respublikasi Prezidenti Masud Pezeshkiyan, Qirg‘iz Respublikasi Prezidenti Sadir Japarov, Tojikiston Respublikasi Prezidenti Emomali Rahmon, Turkiya Respublikasi Prezidenti Rejep Tayyip Erdo‘g‘an, Pokiston Islom Respublikasi Bosh vaziri Shahbaz Sharif, Qozog‘iston Respublikasi Bosh vaziri Oljas Bektenov, Turkmaniston Vazirlar Mahkamasi Raisining o‘rinbosari – Tashqi ishlar vaziri Rashid Meredov, Afg‘oniston Bosh vazirining vazifasini bajaruvchi o‘rinbosari Mulla Abdul G‘ani Baradar, IHT Bosh kotibi Asad Majid Xon, shuningdek, bir qator boshqa davlatlar va mintaqaviy tashkilotlarning delegatsiya rahbarlari ham ishtirok etdi.
IHT doirasida ko‘p qirrali hamkorlikni yanada rivojlantirish istiqbollari ko‘rib chiqildi, dolzarb xalqaro va mintaqaviy masalalar yuzasidan fikr almashildi.
O‘z nutqining boshida O‘zbekiston Prezidenti xavfsizlik va barqaror rivojlanishga tahdid solayotgan zamonaviy muammolarni qayd etdi.
O‘zbekiston rahbari mojarolar va nizolarni diplomatiya va konstruktiv muzokaralar yo‘li bilan hal etish muhimligini ta’kidladi.
Yaqin Sharqda tinchlik va barqarorlikka Falastin-Isroil mojarosini adolatli hal etmasdan erishib bo‘lmasligi ta’kidlandi.
O‘zbekiston Prezidenti yig‘ilish kun tartibiga o‘tar ekan, bir qator dolzarb masalalarga e’tibor qaratdi.
Avvalo, Tashkilotning o‘rta va uzoq muddatli rivojlanish ustuvorliklarini ilgari surish maqsadida «Iqtisodiy sheriklikning strategik maqsadlari – 2035» konsepsiyasini qabul qilish muhimligi qayd etildi. Ushbu hujjatda an’anaviy hamkorlik yo‘nalishlaridan tashqari, innovatsiyalar, sun’iy intellekt va raqamli texnologiyalar sohalarida ham hamkorlikni mustahkamlashga alohida e’tibor qaratilishi zarur.
Tovarlar va xizmatlar savdosini soddalashtirish, texnik va notarif to‘siqlarni bosqichma-bosqich bartaraf etish hamda elektron tijoratni rivojlantirish masalalari dolzarbligicha qolmoqda.
Ushbu yo‘nalishdagi strategik masalalarni muhokama qilish va Savdoni osonlashtirish to‘g‘risidagi bitimni qabul qilish uchun joriy yilda Toshkent shahrida savdo vazirlarining uchrashuvini o‘tkazish taklif etildi.
Davlat rahbari, shuningdek, qishloq xo‘jaligi mahsulotlari savdosi bo‘yicha tezkor ma’lumot almashish va ularni to‘siqlarsiz yetkazib berish uchun «yashil yo‘laklar» tizimini yaratish tashabbusini ilgari surdi.
Investitsiya sohasidagi hamkorlikni yangi bosqichga olib chiqish va yanada shaffof va jozibador investitsiya muhitini yaratish uchun uzoq muddatli «EcoInvest» dasturini qabul qilish muhimligi ta’kidlandi.
«Dasturning asosiy maqsadi xususiy investorlar, banklar va xalqaro moliya institutlarini mintaqamizdagi istiqbolli loyihalarga keng jalb qilishdan iborat bo‘lishi kerak», – deb ta’kidladi O‘zbekiston rahbari.
Joriy geosiyosiy sharoitda muqobil transport yo‘laklarini shakllantirish strategik ustuvor vazifa sifatida belgilandi. Kelajakda istiqbolli Trans-Afg‘on yo‘lagi bilan integratsiya qilinishi mumkin bo‘lgan Xitoy – Qirg‘iziston – O‘zbekiston temir yo‘li loyihasi ulkan mintaqadagi tranzit tarmoqlarini samarali bog‘lashi qayd etildi.
Davlatimiz rahbari, shuningdek, transport va logistika sohasini raqamlashtirish bo‘yicha tizimli ishlarni yo‘lga qo‘yish maqsadida Raqamli transport va bojxona departamentini tashkil etishni jadallashtirishni taklif qildi.
«Hozirgi vazifalarimiz – mintaqada yangi aviaqatnovlarni ochish, aviakompaniyalar o‘rtasida innovatsion hamkorlik shakllarini joriy etish, turizm va aviatsiya sohalarida integratsiyalashgan marketing strategiyalarini ishlab chiqishdan iborat», – dedi O‘zbekiston rahbari.
Ushbu masalalarni muhokama qilish uchun joriy yilda Samarqand shahrida milliy aviakompaniyalar forumini tashkil etish taklif etildi.
Turistik oqimni ikki barobar oshirish uchun katta salohiyat mavjudligi qayd etildi. Tashkilot doirasida turizm xizmatlarini kengaytirish bo‘yicha «yo‘l xaritasi»ni qabul qilish ushbu maqsadga erishishga xizmat qiladi.
Global iqlim kun tartibini hal etishda sa’y-harakatlarni birlashtirish muhimligini qayd etgan Prezident cho‘l hududlarida o‘rmonlar va rekreatsion zonalar yaratish bo‘yicha transchegaraviy «yashil dastur»ni ishlab chiqish tashabbusini ilgari surdi.
O‘zbekiston rahbari Yuqori darajadagi qo‘mitaning ishini ijobiy baholab, unga keyingi sammitga qadar IHT faoliyatini takomillashtirish bo‘yicha aniq tavsiyalar tayyorlashni topshirishni taklif qildi.
«Islohotlar hamkorligimizni yangi darajaga olib chiqishga va Tashkilotning xalqaro maydondagi nufuzini yanada mustahkamlashga xizmat qiladi», – dedi Prezident.
Davlatimiz rahbari so‘zining so‘ngida ushbu sammit Iqtisodiy hamkorlik tashkiloti doirasidagi ko‘p qirrali amaliy hamkorlikka kuchli turtki berishiga va yangi bosqichni ochib berishiga ishonch bildirdi.