Zamin jamgʻarmasi xabariga koʻra, Toshkentda Jahon yoshlar festivali boshlandi.
Ushbu festival yoshlar va hukumatlar oʻrtasidagi muloqot uchun muhim xalqaro maydon boʻlib xizmat qiladi. Yosh ishtirokchilar barqaror rivojlanish va atrof-muhitni yaxshilashga qaratilgan innovatsion yechimlarni taklif qilishadi.
Zamin jamgʻarmasi vasiylik kengashi raisi “Raqamli yashil tashabbuslar haftasi”ning ochilish marosimida ishtirok etdi. U yosh ishtirokchilar bilan birgalikda atrof-muhit loyihalari va startaplarini oʻrganib chiqdi hamda qayta ishlangan buyumlar yaratish boʻyicha master-klasslarda qatnashdi.
Ziroat Mirziyoyeva yosh ekolog-faollari bilan muloqot qildi va festivalning eng yosh ishtirokchilari bilan birga “Yashil makonga” va “Bek va Lola” animatsion filmlarini tomosha qildi. Bu filmlar butun hafta davomida Yaponiya bogʻining qulay muhitida barcha mehmonlar uchun namoyish etiladi.
Festival toʻrtta tematik haftadan iborat boʻlib, 15-maydan 30-iyungacha Toshkent, Qoraqalpogʻiston Respublikasi va Samarqand viloyatida oʻtkaziladi.
Ushbu keng koʻlamli tadbirda 50 dan ortiq mamlakatlardan 300 dan ortiq xalqaro tashkilotlar va yoshlar guruhlari vakillari, mutaxassislar, ekspertlar va yosh ekologlar ishtirok etmoqda.