Davlat xavfsizlik xizmati (DXX) matbuot xizmatining xabar berishicha, Fuqarolarni pul evaziga Janubiy Koreyaga ishlashga jo‘natish bilan shug‘ullangan Migratsiya agentligi xodimlariga nisbatan jinoyat ishi qo‘zg‘atildi.
Xabarda aytilishicha, DXX xodimlari noqonuniy migratsiyaga qarshi kurashish va fuqarolarning chet elda og‘ir ahvolga tushib qolishining oldini olish maqsadida tezkor tadbirlar o‘tkazgan.
Xususan, Vazirlar Mahkamasi huzuridagi Migratsiya agentligining Namangan filiali bosh mutaxassisi o‘z mansab vakolatidan foydalanib, bir guruh fuqarolarning ishonchiga kirib, ularni aldash yo‘li bilan Janubiy Koreyaga ishlashga yuborishni va’da qilgan. U 41 000 AQSh dollari miqdoridagi pulni olayotgan vaqtida ashyoviy dalillar bilan qo‘lga olindi.
Dastlabki tergov davomida uning ushbu noqonuniy faoliyatni Agentlikning markaziy apparati bosh mutaxassisi bilan birgalikda amalga oshirgani aniqlandi. Tezkor tadbir davom ettirilib, ushbu xodim ham yuqorida ko‘rsatilgan summadan 15 000 AQSh dollari olayotgan vaqtida qo‘lga olindi.
Bundan tashqari, aniqlanishicha, Agentlikning ushbu xodimlari 2024-yilda 80 dan ortiq fuqarodan Janubiy Koreyaga yuborish uchun 700 000 AQSh dollaridan ortiq pul olgan, biroq bugungi kungacha va’dalarini bajarmagan.
Mazkur fakt bo‘yicha ushbu shaxslarga nisbatan Jinoyat kodeksining 168-moddasi va 28,211-moddalari bilan jinoyat ishi qo‘zg‘atildi. Jinoyat guruhining qolgan a’zolarini aniqlash va ularni javobgarlikka tortish bo‘yicha zarur choralar ko‘rilmoqda.