Qozogʻiston Transport vazirligi xabariga koʻra, Markaziy Osiyo mamlakatlari va Xitoy transport vazirlari ikkinchi uchrashuvi Ostona shahrida boʻlib oʻtdi.
Xitoyning transport vaziri Lyu Vey boshchiligidagi va Oʻzbekiston transport vazirining birinchi oʻrinbosari Omarov Mamanbiy, Qirgʻiziston transport va kommunikatsiyalar vaziri Sirgabaev Absattar, Tojikiston transport vaziri Ibrohim Azim hamda Turkmaniston transport va kommunikatsiyalar agentligi bosh direktori Chakyev Mammethanlar ishtirok etgan besh davlat delegatsiyalari transport va logistika sohasidagi muhim masalalarni muhokama qilish uchun Ostona shahrida yigʻildilar.
Vazirlar mintaqaviy va jahon transport sektorining hozirgi holati toʻgʻrisida fikr almashishdi va Xitoy hamda Markaziy Osiyo davlatlari oʻrtasidagi iqtisodiy, savdo va gumanitar hamkorlikdan toʻla foydalanish yoʻllarini oʻrganishdi.
Olti tomonlama uchrashuvda Markaziy Osiyo mamlakatlari va Xitoy oʻrtasida koʻp tomonlama transport hamkorligi dasturini ishlab chiqish zarurati taʼkidlandi. Ushbu dastur elektron hujjatlarni boshqarish va yuklarni real vaqtda kuzatishni osonlashtiradi. Vazirlar xalqaro avtomobil transportida ishni soddalashtirish va xalqaro ruxsatnomalar (XRN) almashinuvini raqamli formatga oʻtkazishni maqsad qilmoqdalar.
XRN – bu chegaralar orqali yuk tashishga ruxsat beradigan hujjatlardir. Qozogʻiston allaqachon Xitoy va Oʻzbekiston bilan XRNni elektron tarzda almashmoqda. Endi bu raqamlashtirish Qirgʻiziston, Turkmaniston va Tojikistonga ham tarqatiladi va bu xalqaro avtomobil transporti tezlashishiga olib keladi.
Vazirlar xalqaro avtomobil transportida raqamlashtirish boʻyicha hamkorlik toʻgʻrisidagi hamda transport idoralari oʻrtasidagi umumiy hamkorlik toʻgʻrisidagi memorandumlarni imzoladilar.
Bundan tashqari, ishtirokchilar Xitoy va Markaziy Osiyo davlatlari oʻrtasidagi nazorat-oʻtkazish punktlarida avtomobil va temir yoʻl transporti uchun chegarani kesib oʻtish tartiblarini soddalashtirish zarurligini kelishib oldilar.