Markaziy Osiyo mamlakatlari va Xitoy transport vazirlarining ikkinchi uchrashuvi Ostonada boʻlib oʻtdi. Bu haqda Qozogʻiston Transport vazirligi xabar berdi.
Xitoyning transport vaziri Lyu Vey boshchiligidagi va Oʻzbekistonning transport vaziri birinchi oʻrinbosari Mamon Umarov, Qirgʻizistonning transport va kommunikatsiyalar vaziri Absattor Sirgʻabeyev, Tojikistonning transport vaziri Ibragim Azim va Turkmanistonning transport va kommunikatsiyalar agentligi bosh direktori Mammetxon Chakiyevlar ishtirokidagi beshta Markaziy Osiyo davlati delegatsiyalari transport va logistika sohasidagi muhim masalalarni muhokama qilish uchun Ostonada yigʻildilar.
Vazirlar mintaqaviy va global transport sektorlarining hozirgi ahvoli toʻgʻrisida fikr almashishdi va Xitoy va Markaziy Osiyo davlatlari oʻrtasidagi iqtisodiy, savdo va gumanitar hamkorlikning toʻla salohiyatidan foydalanishni muhokama qildilar.
Olti tomonlama uchrashuv davomida transport rahbarlari Markaziy Osiyo mamlakatlari va Xitoy oʻrtasida transport sohasida Koʻp tomonlama hamkorlik dasturini yaratish zarurligini ta’kidlashdi. Ushbu dastur elektron hujjatlarni boshqarish va yuklarni real vaqtda kuzatishni osonlashtiradi. Vazirlar xalqaro avtomobil transportiga tezlashtirish va xalqaro ruxsatnomalar (XR) almashinuvini raqamli formatga oʻtkazishni niyat qilmoqdalar.
Xalqaro ruxsatnomalar tashuvchilarga tovarlarni chegaralardan oʻtkazishga ruxsat beradigan hujjatlardir. Qozogʻiston allaqachon Xitoy va Oʻzbekiston bilan XRni elektron ravishda almashmoqda. Endi bu raqamlashtirish Qirgʻiziston, Turkmaniston va Tojikistonga ham taalluqli boʻlib, xalqaro avtomobil transportini sezilarli darajada tezlashtiradi.
Vazirlar xalqaro avtomobil transportini raqamlashtirishda hamkorlik toʻgʻrisidagi hamda transport agentliklari oʻrtasidagi umumiy Anglashuv memorandumini imzoladilar.
Bundan tashqari, tomonlar Xitoy va Markaziy Osiyo mamlakatlari oʻrtasida avtomobil va temir yoʻl transporti uchun chegarani kesib oʻtish tartiblarini soddalashtirish zarurligi toʻgʻrisida kelishib oldilar.