Malayziya Oʻzbekiston universitetlariga ingliz tilidagi ilmiy adabiyotlarni xayriya sifatida taqdim etdi. Bu haqda “Dunyo” axborot agentligi xabar berdi.
Agentlikning xabar berishicha, “Oʻzbekiston oliy ta’lim muassasalarining ilmiy-metodik bazasini mustahkamlash va kutubxonalarni xorijiy adabiyotlar bilan boyitish maqsadida Malayziyaning yetakchi oliy ta’lim muassasalaridan 20 000 AQSh dollari miqdoridagi ingliz tilidagi oʻquv va ilmiy adabiyotlar koʻrinishidagi texnik yordam olindi.”
Oʻzbekistonning Kuala-Lumpurdagi elchixonasi va Malayziyaning Universiti Teknologi MARA (UiTM) universiteti oʻrtasidagi muzokaralar natijasida, asosan muhandislik, tibbiyot, moliya va iqtisod, kimyo va biologiya, matematika hamda kompyuter fanlariga oid taxminan 500 ta ingliz tilidagi nashr “Oʻzbekiston Havo Yoʻllari” orqali Oʻzbekistonga yuborildi.