Yangi paydo bo’lgan video lavhada Luvr muzeyidagi o’g’irlikni uyushtirganlikda gumonlanayotgan shaxslarning kunduz kuni mexanik narvon orqali qochib ketayotgani aks etgan.
Videoda ikkita shaxsning 88 million yevro (77 million funt sterling)ga baholangan Fransiya toj zargarlik buyumlarini o’g’irlash bilan yakunlangan Parijdagi mashhur muzeyga qilingan o’g’irlikdan so’ng ehtiyotkorlik bilan narvondan tushayotgani ko’rsatilgan.
To’rt kishilik guruh hanuzgacha erkinlikda. Chorshanba kuni Luvr direktori Lorans des Kars o’g’irlangan artefaktlar saqlanayotgan galereyada kamera qamrovi yetarli bo’lmagani sababli xavfsizlik xodimlari jinoyatchilarni tezda aniqlay olmaganini tan oldi.
Videoda narvon bilan jihozlangan yuk mashinasi Sena bo’yidagi gavjum ko’chada to’xtab turgani, yonidan transport vositalari o’tib ketayotgani tasvirlangan.
Des Kars Fransiya qonun chiqaruvchilariga Luvr muzeyi ichida ham, tashqarisida ham videokuzatuv kameralari sonini ikki baravar oshirish rejalari haqida ma’lum qildi.
Uning ta’kidlashicha, zargarlik buyumlari namoyish etilgan janubiy tomondagi Apollon galereyasiga qaratilgan kamera noto’g’ri joylashtirilgan.
Parij prokurori Lor Bekku Ouest France gazetasiga politsiya tergovi doirasida hozirgacha taxminan 150 ta DNK va barmoq izlari namunasi yig’ilganini aytdi.
O’g’irlik yakshanba kuni mahalliy vaqt bilan soat 09:30 da (GMT 07:30) Luvr jamoatchilik uchun ochilganidan ko’p o’tmay, sakkiz daqiqadan kamroq vaqt ichida sodir bo’ldi.
O’g’rilar sakkizta buyumni, jumladan, Napoleon Bonapart ikkinchi xotini Mari-Luizga to’y kuni sovg’a qilgan zumrad marjon va sirg’alarni olib ketishdi.
Qochish paytida jinoyatchilar imperator Yevgeniyga tegishli bo’lgan XIX asrga oid olmos bilan bezatilgan tojni tushirib yuborishdi.
Toj qaytarib olingan bo’lsa-da, unga zarar yetgan, des Karsning aytishicha, o’g’rilar uni namoyish etish shkafidan kuch bilan olib tashlaganida, u ezilib ketgan bo’lishi mumkin.