BAKU /Trend/ – Isroil Isfaxon shahridagi Eron yadro obyektlariga bir hafta ichida ikkinchi marta hujum uyushtirganligi va bu hujum natijasida obyekt hududidagi bir nechta binolarga jiddiy zarar yetkazilganligi haqida xabarlar tarqaldi.
Bu haqda bugun Xalqaro Atom Energiyasi Agentligi (XAEA) bosh direktori Rafael Mariano Grossi Trend axborot agentligiga ma’lum qildi.
XAEA ma’lumotlariga ko’ra, Isfaxon obyektiga dastlab 13-iyunda hujum uyushtirilgan va natijada to’rtta bino, jumladan, markaziy kimyoviy laboratoriya, uran konvertatsiya zavodi, reaktor yoqilg’isi ishlab chiqarish zavodi va boyitilgan metall uranini qayta ishlash bo’yicha qurilishi davom etayotgan obyektga zarar yetgan. O’sha paytda obyekt tashqarisida radiatsiya darajasining oshishi kuzatilmagan.
XAEA, shuningdek, Isfaxon obyektidagi sentrifuga ishlab chiqarish ustaxonasining ham bugungi hujumlarning nishonlaridan biri bo’lganini tasdiqladi.
Grossi ta’kidlaganidek, zararlangan binolarda yadro materiali yo’q yoki faqat oz miqdordagi tabiiy yoki kam boyitilgan uran bo’lgan, shuning uchun potentsial radioaktiv ifloslanish faqat zararlangan inshootlar bilan chegaralangan.
«Isfaxondagi bu yadro majmuasi – Eronning yadro dasturining muhim qismi – takroran hujumga uchradi va jiddiy zarar ko’rdi. Yadro materialining mavjudligiga oid tahlilimizga ko’ra, obyekt tashqarisida ifloslanish xavfi yo’q. Biroq, men takroran ta’kidlaganimdek, yadro obyektlariga hech qachon hujum qilinmasligi kerak», – deb ta’kidladi Grossi.