Senat tomonidan Energetika vaziriga Toshkent shahrida elektr ta’minoti bilan bog’liq muammolar yuzasidan senatorlik so’rovi yuborildi, bu haqda Senatning press-relizida xabar qilingan.
So’rovda Toshkentda elektr uzilishlarining tez-tez takrorlanishi masalasi ko’tarilgan bo’lib, bu aholining kundalik hayoti, ijtimoiy infratuzilma va biznes faoliyatiga salbiy ta’sir ko’rsatmoqda.
«Aholi va biznes egalari 3-4 soatlik elektr uzilishlari haqida ko’plab shikoyatlar qilmoqda, bu nafaqat fuqarolarning kundalik hayotiga, balki biznesning faoliyatiga ham salbiy ta’sir qilmoqda. Ijtimoiy infratuzilma ob’ektlarining barqaror ishlashida ham muammolar yuzaga kelmoqda», – deyiladi xabarda.
So’rovda, shuningdek, svetofor tizimlarining ishdan chiqishi transport harakatini boshqarishga to’sqinlik qilayotgani, yo’l harakati xavfsizligiga tahdid solayotgani ta’kidlangan. Bundan tashqari, ishlab chiqarish va tijorat ob’ektlarida sovutish tizimlarining ishdan chiqishi qayd etilib, bu jiddiy moliyaviy zararlarga olib kelmoqda. Aholi elektr tokining kuchlanishi va uzilishi tufayli maishiy texnikalarining shikastlanishidan ham shikoyat qilmoqda.
«Elektr energetikasi to’g’risida»gi qonunning 39-moddasida elektr energiyasi iste’molchilari ishonchli va sifatli elektr ta’minotini olish huquqiga ega ekanligi belgilab qo’yilgan. Bundan tashqari, xuddi shu qonunning 61-moddasida ta’minotni to’xtatish yoki cheklash faqat avariyalarning oldini olish yoki nosozliklarni bartaraf etish uchun amalga oshirilishi mumkinligi ko’rsatilgan.
Ushbu muammolarni inobatga olgan holda, Senatning Agrar, suv xo‘jaligi masalalari va ekologiya qo‘mitasi raisining o‘rinbosari Sayyora Abdikarimova O‘zbekiston Respublikasi energetika vaziri Jo‘rabek Mirzamahmudovga senatorlik so‘rovi bilan murojaat qilib, ushbu masala yuzasidan izoh berishni so‘radi.