AQSh Mudofaa vaziri Pit Xegsetni olib ketayotgan samolyot Belgiyadagi NATO mudofaa vazirlari yig’ilishidan AQShga qaytayotganda Buyuk Britaniyaga rejasiz qo’nganini Pentagon X orqali tasdiqladi.
Xegsetni olib ketayotgan samolyotda «samolyot oynasida darz ketgan».
«Samolyot standart tartib asosida qo’ndi va bortdagi hamma, shu jumladan vazir Xegset ham xavfsiz», – deyiladi AQSh hukumati bayonotida.
Vazir Xegset qo’nganidan keyin shunday deb yozdi: «Hamma yaxshi. Xudoga shukur. Vazifani davom ettiramiz!»
BBC Verify ma’lumotlariga ko’ra, samolyot Irlandiya janubi-g’arbiy sohilidan pastlaya boshlagan. FlightRadar24 ma’lumotlari samolyot keyin sharqqa burilib, 10 000 fut balandlikka tushganini ko’rsatadi.
O’sha paytda samolyot transponder orqali «7700 squawk code» signalini uzata boshladi, bu odatda bortdagi umumiy favqulodda vaziyatni ko’rsatish uchun ishlatiladi, bunga dvigatelning ishdan chiqishi, bosimning pasayishi yoki tibbiy holat kabi stsenariylar kiradi.
E’tiborlisi, fevral oyida Davlat kotibi Marko Rubioni olib ketayotgan hukumat samolyoti kokpit oynasida darz ketgani sababli bazaga qaytishga majbur bo’lgan edi.
Mudofaa vazirlari chorshanba kuni Belgiyada Ukraina bilan bog’liq xavfsizlik masalalarini muhokama qilish uchun yig’ilishdi.