22 yoshli Oʻzbekiston fuqarosi J.M. Bolgariyaning Sozopol shahridagi Kavatsi plyajida choʻkayotgan qizni qutqarishga urinayotganda fojiali tarzda vafot etdi. Oʻzbekistonning Istanbuldagi Bosh konsulligi bu haqda xabar berdi.
Fojea 7-avgust kuni sodir boʻlgan. Fuqaro choʻkayotgan Ukraina fuqarosini qutqarishga uringan, biroq kuchli toʻlqinlar tufayli yigit oʻzini boshqara olmay, suv ostidagi katta toshlar orasida qolib ketgan.
9-avgust kuni J.M.ning jasadi Bolgariya Favqulodda vaziyatlar vazirligi qutqaruvchilari tomonidan suvdan olib chiqilgan.
Hozirda Oʻzbekistonning Istanbuldagi Bosh konsulligi Bolgariyadagi Faxriy konsullik bilan hamkorlikda jasadni vatanga qaytarish uchun zarur choralarni koʻrmoqda.