Zamin jamgʻarmasi xabariga koʻra, Toshkentda Butunjahon yoshlar festivali boshlandi.
Festival yoshlar va hukumatlar oʻrtasidagi muloqot uchun muhim xalqaro maydon boʻlib, unda yosh ishtirokchilar barqaror rivojlanish va atrof-muhitni yaxshilash boʻyicha innovatsion yechimlarni taklif qilishadi.
Zamin jamgʻarmasi vasiylik kengashi raisi “Raqamli yashil tashabbuslar haftasi”ning ochilish marosimida ishtirok etib, yoshlar bilan muloqot qildi, ekologik loyihalar va startaplarni oʻrgandi hamda qayta ishlash hunarmandchiligi boʻyicha seminarlarda qatnashdi.
Ziroat Mirziyoyeva yosh ekolog-faollari bilan suhbatlashdi va festivalning eng yosh ishtirokchilari bilan birga hikoya aytib berish va animatsion filmlarni, jumladan, “Yashil Makon” va “Bek va Lola” filmlarini tomosha qilishda ishtirok etdi. Ushbu filmlar butun hafta davomida Yapon bogʻida namoyish etiladi.
Festival toʻrtta tematik haftadan iborat boʻlib, 15-may kuni boshlanib, 30-iyungacha Toshkent, Qoraqalpogʻiston Respublikasi va Samarqand viloyatida davom etadi.
Ushbu keng koʻlamli tadbirda 50 dan ortiq mamlakatlardan xalqaro tashkilotlar va yoshlar guruhlarining 300 dan ortiq vakillari, mutaxassislar, ekspertlar va yosh ekologlar ishtirok etmoqda.