Qozog‘istonning Olmaota shahrida bir erkak shahar aeroportida o‘zini yoqishga urinibdi. Bu hodisa haqida Qozog‘iston Ichki ishlar vazirligi xabar berdi.
«2025-yil 25-avgust kuni soat 22:06 da bir erkak Olmaota aeroportining T-1 terminalidagi kassalar yonida o‘zini yoqishga urindi», – deyiladi xabarda.
Rasmiylarning ta’kidlashicha, politsiya xodimlari aeroport xavfsizlik xodimlari bilan birgalikda darhol xavfsizlik choralarini ko‘rib, yong‘inni o‘chirishgan va tez yordam chaqirishgan. Tibbiyot xodimlari erkakni shahar kasalxonasiga olib ketishdi.
Internetda tarqalgan videolarda beysbol kepkasini va kurtka kiygan erkak bilet kassasi yonida turganini ko‘rish mumkin. Keyin olov alanga oladi va u yiqilishdan oldin yugurib chiqadi. Guvohlar olovni o‘t o‘chirgichlar bilan o‘chirishmoqda.
Transport politsiyasi departamentining xabar berishicha, erkakning bu harakatlariga uning fuqarolik nikohidagi rafiqasi bilan shaxsiy kelishmovchilik sabab bo‘lgan. Departament hodisaning barcha holatlari tergovga qadar tekshiruv davomida aniqlanishini qo‘shimcha qildi.
Departament tomonidan hodisa yuzasidan jinoyat ishi qo‘zg‘atilgan.
Olmaota shahar sog‘liqni saqlash boshqarmasining ma’lumotlariga ko‘ra, bemor tez yordam mashinasida 4-son shahar klinik kasalxonasiga olib ketilgan va reanimatsiya bo‘limiga yotqizilgan.
«Uning ahvoli o’ta og’ir. U Sog‘liqni saqlash vazirligining klinik protokoli asosida to‘liq davolanishni olmoqda», – deyiladi xabarda.