Shavkat Mirziyoyevning taklifiga binoan, Iordaniya Hoshimiylar Podshohligi qiroli Abdulla II ibn Al-Husayn 25-avgust kuni davlat tashrifi bilan Oʻzbekistonga keldi, deyiladi Prezident matbuot xizmatining bayonotida.
Iordaniya qirolini Samarqand xalqaro aeroportida Oʻzbekiston Respublikasi Prezidenti Shavkat Mirziyoyev kutib oldi.
Ikkala davlat bayroqlari koʻtarildi va mehmon sharafiga faxriy qorovul saf tortdi.
Milliy qoʻshiq va raqslar bilan rasmiy marosim oʻtkazildi.
Tashrifning asosiy tadbirlari ertaga rejalashtirilgan.
Bugun Abdulla II ibn Al-Husayn Shavkat Mirziyoyev bilan birgalikda qadimiy Samarqand shahrining ajoyib meʼmoriy yodgorliklarini ziyorat qildi.
Davlat rahbarlari ziyoratni Shohizinda majmuasidan boshladilar.
Ushbu majmua Muhammad paygʻambarning sahobasi Qusam ibn Abbos va boshqa tarixiy shaxslarning maqbaralarini oʻz ichiga oladi. Uning tarixiy, madaniy va badiiy qiymati bir necha asrlar davomida meʼmorchilik va bezak sanʼatining evolyutsiyasini aks ettirishidadir. Shohizinda 2001-yilda UNESCOning Jahon merosi roʻyxatiga kiritilgan.
Oʻz nasl-nasabini rasman Muhammad paygʻambarning qizi Fotima va kuyovi Ali ibn Abu Tolibga bogʻlaydigan Hoshimiylar sulolasining vakili boʻlgan Iordaniya qiroli Qusam ibn Abbos xotirasiga hurmat bajo keltirdi. Qurʼondan suralar oʻqildi.
Amir Temur maqbarasiga tashrif buyurgan Iordaniya delegatsiyasiga buyuk ajdodimizning davlat qurish siyosati, uning harbiy isteʼdodi va turli davlatlar bilan diplomatik aloqalari haqida maʼlumot berildi. Sohibqironning hayoti va faoliyati, shuningdek, u yaratgan oʻz davrining eng yirik davlati mehmonlarda katta taassurot qoldirdi.
Davlat rahbarlari, shuningdek, Mirzo Ulugʻbek madrasasi, Sherdor madrasasi va Tillaqori madrasasidan iborat Registon maydoniga tashrif buyurdilar. Ushbu yodgorliklar asrlar davomida tadqiqotchilarni oʻziga jalb qilib kelgan va yuzlab olimlar uchun maktab vazifasini oʻtagan. Oʻzining simmetriyasi va meʼmoriy koʻrinishi bilan Registon haqli ravishda Samarqandning «tashrif qogʻozi» hisoblanadi.
Tashrif davomida mehmonga ushbu inshootning qurilish tarixi va bezaklarining xususiyatlari, shuningdek, maydonda olib borilgan restavratsiya ishlari haqida maʼlumot berildi.