O‘zbekiston Respublikasi Prezidenti Shavkat Mirziyoyevning taklifiga binoan, Iordaniya Hoshimiy Podshohligi Podshohi Abdulla II ibn Al-Husayn joriy yilning 25-26-avgust kunlari davlat tashrifi bilan O‘zbekistonda bo‘ladi. Bu haqda Prezident matbuot xizmati xabar berdi.
Yuqori darajadagi tashrifning asosiy tadbirlari Samarqand shahrida bo‘lib o‘tadi.
Sammit kun tartibiga siyosiy, savdo-iqtisodiy va investitsiyaviy hamkorlikni rivojlantirish, kimyo, farmatsevtika, qishloq xo‘jaligi, to‘qimachilik, tog‘-kon sanoati va boshqa sohalarda hamkorlikni yo‘lga qo‘yish, shuningdek, madaniy-gumanitar almashinuvlarni kengaytirish masalalari kiritilgan.
Xalqaro va mintaqaviy siyosatning dolzarb jihatlari yuzasidan ham fikr almashiladi.
Muzokaralar yakunida ikki tomonlama bitimlar to‘plami imzolanishi kutilmoqda.