Oʻzbekistonda davlat ishtirokisiz korxonalarga eksport boʻyicha muddati oʻtgan qarzdorliklar uchun bir yil muddatga penya hisoblash va undirishga moratoriy joriy etiladi. Bu haqda Shavkat Mirziyoyev 20-avgust kuni tadbirkorlar bilan ochiq muloqotda ma’lum qildi.
Prezidentning ta’kidlashicha, ayrim mintaqalardagi mojarolar, tashqi bozordagi o‘zgarishlar va logistika uzilishlari eksport tushumlarining kechikishiga sabab bo‘lmoqda. Bunday vaziyatda to‘lovlarni o‘z vaqtida ololmayotgan tadbirkorlar qo‘shimcha jarima to‘lashga majbur bo‘lmoqda.
Davlat rahbarining so‘zlariga ko‘ra, to‘qimachilik korxonalari va meva-sabzavot eksport qiluvchilar bu masala bo‘yicha unga bir necha bor murojaat qilishgan. Natijada, davlat ishtirokisiz korxonalarga bir yil davomida eksport bo’yicha muddati o’tgan qarzdorliklar uchun penya hisoblanmasligi yoki undirilmasligi to’g’risida qaror qabul qilindi.