Oʻzbekiston Prezidenti Administratsiyasi rahbari Saida Mirziyoyeva Qirgʻiziston Prezidenti Sadir Japarov bilan uchrashdi. Bu haqda u oʻzining Telegram kanalida maʼlum qildi.
«Qirgʻiz Respublikasi Prezidenti Sadir Japarovga iliq qabul va ochiq hamda ishonchli muhitda oʻtgan mazmunli uchrashuv uchun minnatdorchilik bildiraman.
Taʼkidlandiki, xalqlarimizni oʻzaro ishonch va hurmatga asoslangan holda rivojlanish va farovonlikka intilish birlashtiradi. Mamlakatimiz Prezidenti Shavkat Mirziyoyev Qirgʻiziston bilan yaqin qoʻshni va strategik sherik sifatida munosabatlarni mustahkamlashga alohida eʼtibor qaratadi,» — deb yozdi Saida Mirziyoyeva.
Bularning barchasi chegaralar boʻyicha muvaffaqiyatli kelishuvlar, milliy ID kartalarni tan olish, qoʻshma korxonalar va Qambar-Ota-1 GESi hamda Xitoy-Qirgʻiziston-Oʻzbekiston temir yoʻli kabi qoʻshma loyihalar bilan tasdiqlangani qayd etildi.
Uchrashuv davomida ikki davlatda oʻtkazilgan «Zakovat» oʻyin turnirlari ham alohida taʼkidlandi. Bu ikki davlat yoshlari oʻrtasida doʻstona aloqalarni mustahkamlashga xizmat qiluvchi juda muvaffaqiyatli loyiha ekanligi urgʻulandi.
«Oʻzbekiston va Qirgʻizistonni asrlar davomida shakllangan qardoshlik va yaxshi qoʻshnichilik rishtalari bogʻlab turadi. Biz ularni qadrlaymiz va mustahkamlashda davom etamiz,» — deya xulosa qildi Mirziyoyeva.