Oʻzbekistonda 15-avgustdan boshlab maktablar va bolalar bogʻchalarida «Majburiy mehnatga qarshi kurashish haftaligi» oʻtkaziladi. Bu haqda Bandlik vazirligi xabar berdi.
Mehnat inspeksiyasi respublika boʻylab barcha taʼlim muassasalarida monitoring tadbirlarini oʻtkazadi.
«Soʻnggi paytlarda oʻqituvchilar va tarbiyachilarning majburiy mehnatga jalb etilgani haqida eʼlon qilingan xabarlar fuqarolarimizning mehnat huquqlari daxlsizligiga tahdid solayotganini koʻrsatadi», — deyiladi vazirlik xabarida.
Hafta davomida nafaqat ish beruvchilar, balki majburiy mehnatga yoʻl qoʻygan barcha masʼul shaxslar ham javobgarlikka tortiladi.
Vazirlikning xabar berishicha, avvalroq ommaviy axborot vositalari va ijtimoiy tarmoqlarda eʼlon qilingan oʻqituvchilar va tarbiyachilarning majburiy mehnatga jalb qilingani haqidagi 10 ga yaqin holat tasdiqlangan. Aybdor mansabdor shaxslar maʼmuriy javobgarlikka tortildi. Qonunbuzarliklar sabablarini oʻrganish va ularning kelib chiqishiga imkon beradigan shart-sharoitlarni bartaraf etish uchun tegishli vazirlik va idoralarga taqdimnomalar yuborildi.
Avvalroq, Andijon viloyatidagi maktablardan birida oʻqituvchilar taʼtil vaqtida maktab taʼmirlash ishlariga jalb qilingan edi. Natijada taʼlim muassasasi direktori lavozimidan ozod etilib, 41 million soʻm jarimaga tortildi. Keyinroq shunga oʻxshash hodisa Samarqandda ham sodir boʻldi.