O’zbekistonning Tokioda istiqomat qiluvchi elchisi Muhsinkho’ja Abdurahmonov Fidji Prezidenti Ratu Viliame Maivalili Katoniverega ishonch yorliqlarini topshirdi, bu haqda Dunyo AA xabar bermoqda.
Marosimda faxriy qorovul va O’zbekiston davlat madhiyasi ijro etildi. Shunisi e’tiborga loyiqki, Fidji tarixida birinchi marta O’zbekiston bayrog’i ko’tarildi.
Marosimdan so’ng bo’lib o’tgan uchrashuvda O’zbekiston va Fidji o’rtasidagi munosabatlarning siyosiy, savdo-iqtisodiy, madaniy-gumanitar, ta’lim va turizm kabi turli sohalardagi hozirgi holati muhokama qilindi. Kelgusida hamkorlik qilish istiqbollari ham o’rganildi.
Fidji Prezidenti ikki davlat o’rtasidagi do’stona munosabatlarni e’tirof etib, bu aloqalar geografik uzoqlikka qaramay, o’zaro hurmat, konstruktiv muloqot va umumiy qadriyatlarga asoslanganini ta’kidladi.
Davlat rahbari O’zbekistonning strategik ahamiyatini, uning boy tabiiy resurslari va katta inson kapitalini tilga oldi. U O’zbekiston Prezidentining mintaqada tinchlik va barqaror rivojlanishni ta’minlashga qaratilgan faol va konstruktiv tashqi siyosatini yuqori baholadi.
Bundan tashqari, O’zbekistonning Fidjiga birinchi elchisining tayinlanishi ikki davlat o’rtasidagi diplomatik munosabatlarda muhim tarixiy bosqich sifatida e’tirof etildi. Fidji tomoni O’zbekiston Prezidentiga Fidji bilan ikki tomonlama va ko’p tomonlama aloqalarni mustahkamlashga qaratayotgan e’tibori uchun alohida minnatdorchilik bildirdi.
So’zining yakunida Fidji Prezidenti O’zbekiston davlati rahbariga o’zining chuqur hurmati va samimiy salomini, shuningdek, o’zbek xalqiga tinchlik va farovonlik tilaklarini yetkazdi.
O’zbekiston va Fidji o’rtasida diplomatik munosabatlar 2010-yil 16-iyunda o’rnatilgan. Muhsinkho’ja Abdurahmonov 2021-yildan beri O’zbekistonning Yaponiyadagi elchisi lavozimida ham faoliyat yuritib kelmoqda.