Turkmanboshiga tashrifi davomida Prezident Shavkat Mirziyoyev Turkmaniston Milliy yetakchisi, Xalq Maslahati Raisi Gurbanguli Berdimuhamedov bilan uchrashuv o‘tkazdi. Bu haqda Prezident matbuot xizmati xabar berdi.
Suhbat avvalida davlatimiz rahbari Gurbanguli Berdimuhamedovni dengizga chiqish imkoniyati bo‘lmagan rivojlanayotgan davlatlar bo‘yicha BMTning uchinchi konferensiyasi yuqori saviyada o‘tkazilgani bilan samimiy tabriklab, uning kun tartibidan o‘rin olgan masalalarning mintaqamiz barqaror rivojlanishi uchun hayotiy ahamiyatini ta’kidladi.
Joriy yilning aprel oyida Samarqand shahrida bo‘lib o‘tgan uchrashuvda erishilgan kelishuvlar ijrosi doirasida O‘zbekiston-Turkmaniston yaxshi qo‘shnichilik va strategik sheriklik munosabatlarini yanada mustahkamlashning dolzarb masalalari ko‘rib chiqildi.
Do‘stlik, o‘zaro ishonch va umumiy manfaatlarini hisobga olish tamoyillariga asoslangan ko‘p qirrali hamkorlikning o‘sib borayotgan dinamikasi chuqur mamnuniyat bilan qayd etildi.
Barcha darajalarda samarali va faol aloqalar davom etmoqda. Yil boshidan buyon tovar ayirboshlash hajmi 600 million dollarni tashkil etdi. Sanoat, energetika, transport, qishloq va suv xo‘jaligi sohalarida va iqtisodiyotning boshqa tarmoqlarida hamkorlik chuqurlashmoqda.
“Shovot-Toshhovuz” chegara savdo zonasi birgalikda tashkil etilmoqda, faol hududlararo aloqalar va gumanitar almashinuvlar davom ettirilmoqda.
Bo‘lajak yuqori darajadagi uchrashuvlarga tayyorgarlik ko‘rish doirasida hukumatlararo komissiyalar, Biznes kengashi, Hududlar forumi yig‘ilishlari va bir qator madaniy tadbirlarni o‘tkazish rejalashtirilgan.
Shuningdek, BMT konferensiyasi va joriy yilning kuzida Toshkentda bo‘lib o‘tadigan Markaziy Osiyo davlatlari rahbarlarining yettinchi Maslahat uchrashuvi kun tartibi yuzasidan atroflicha fikr almashildi.